لیموں کو عموماً کھانوں کا ذائقہ بڑھانے اور صحت بخش غذا کے طور پر استعمال کیا جاتا ہے تاہم اس کی خوشبو اعصاب پر اثر انداز ہو کر اسے پرسکون رکھنے میں بھی اپنی مثال نہیں رکھتی۔
لیموں کی مسحور کن مہک گھر کے ماحول کو خوش گوار بناتی ہے تاہم کچھ روپورٹس میں بیڈ روم میں لیموں کے ٹکڑے رکھنے کے مختلف فوائد بھی بیان کیے گئے ہیں جن میں کمرے کی ناگوار بو کم کرنے سے لے کر سکون اور بہتر نیند تک کے دعوے شامل ہیں۔
صحت سے متعلق معلومات شائع کرنے والی ویب سائٹ ’بولڈ اسکائی‘ کی ایک رپورٹ میں بیڈ روم میں لیموں کے چند ٹکڑے رکھنے کے سات فوائد بیان کیے گئے ہیں۔ تاہم، ان میں سے بعض دعوؤں کے لیے سائنسی شواہد محدود ہیں۔
بیڈ روم میں لیموں رکھنے کے 7 ممکنہ فوائد
کمرے کی ناگوار بو میں کمی
لیموں کی تازہ خوشبو کمرے میں ناگوار بو کو عارضی طور پر کم کرنے میں مدد دے سکتی ہے۔ تاہم، یہ کمرے میں موجود بدبو کی اصل وجہ یا نقصان دہ جراثیم کو ختم کرنے کا متبادل نہیں۔
پرسکون ماحول کا احساس
لیموں کی خوشبو بعض افراد کے لیے خوش گوار اور ذہنی طور پر سکون بخش ثابت ہوتی ہے اس سے کمرے کا ماحول زیادہ آرام دہ محسوس ہوتا ہے تاہم ہر شخص پر اس کا یکساں اثر نہیں ہوتا۔
یہ بھی پڑھیں: روزانہ آدھا لیموں کا استعمال جسم میں کیا حیرت انگیز تبدیلیاں لاتا ہے
بہتر نیند میں مدد
خوش گوار مہک سونے سے پہلے آرام دہ ماحول بنانے میں معاون ہوسکتی ہے تاہم اس بات کے مضبوط شواہد موجود نہیں کہ محض لیموں کے ٹکڑے بیڈ روم میں رکھنے سے نیند کا معیار بہتر ہوجاتا ہے۔
4مکھیوں اور بعض حشرات سے بچاؤ
لیموں کی خوشبو بعض حشرات کو ناگوار گزر سکتی ہے لیکن صرف لیموں کے ٹکڑے رکھنے سے مکھیوں اور مچھروں سے مکمل تحفظ کی ضمانت نہیں دی جاسکتی۔ ضرورت پڑنے پر مؤثر حشرات کش تدابیر اختیار کرنا زیادہ مناسب ہے۔
جسمانی تھکن میں کمی کا احساس
پرسکون ماحول اور پسندیدہ خوشبو بعض افراد کو ذہنی طور پر تازگی کا احساس دلاتی ہے لیموں کی خوشبو بذاتِ خود جسمانی تھکن ختم کرنے کا ثابت شدہ علاج نہیں۔
فشارِ خون پر ممکنہ اثرات
بعض دعوؤں میں لیموں کی خوشبو کو فشارِ خون میں کمی سے جوڑا جاتا ہے تاہم صرف کمرے میں لیموں رکھنے سے ہائی بلڈ پریشر قابو میں آنے کے قابلِ اعتماد شواہد موجود نہیں۔ بلڈ پریشرکے مریضوں کو تجویز کردہ علاج جاری رکھنا چاہیے۔
ہوا میں تازگی کا احساس
لیموں کی خوشبو کمرے میں تازگی کا حساس جگاتی ہے لیکن لیموں کے ٹکڑے ہوا سے گردوغبار، نقصان دہ گیسوں یا جراثیم کو مؤثر طور پر صاف نہیں کرتے۔ کمرے میں تازہ ہوا کی آمدورفت اور صفائی زیادہ اہم ہیں۔
بیڈ روم میں لیموں رکھنے کا درست طریقہ
اگر آپ کو لیموں کی خوشبو پسند ہے تو ایک صاف برتن میں لیموں کے چند ٹکڑے رکھ سکتے ہیں۔ تاہم، انہیں روزانہ تبدیل کریں، کیونکہ زیادہ دیر تک رکھے رہنے سے لیموں خراب ہوسکتا ہے اور پھپھوندی پیدا ہونے کا امکان بڑھ جاتا ہے۔
