واشنگٹن: چینی صدر شی جن پنگ وائٹ ہاؤس پہنچ گئے جہاں امریکی صدر ڈونلڈ ٹرمپ نے ان کا استقبال کیا جب کہ دونوں رہنماؤں کے درمیان دوطرفہ تعلقات، تجارت، سلامتی اور مصنوعی ذہانت سمیت اہم امور پر بات چیت ہوئی۔
وائٹ ہاؤس میں ہونے والی ملاقات کے دوران صدر ڈونلڈ ٹرمپ نے کہا کہ امریکا اور چین کے درمیان تعلقات میں نمایاں پیش رفت ہوئی ہے اور دونوں ممالک کے درمیان زیادہ متوازن تجارتی تعلقات کی سمت میں کام کیا جارہا ہے۔
امریکی صدر نے چینی ہم منصب کے ساتھ اپنی دوستی کا ذکر کرتے ہوئے کہا کہ امریکا اور چین کے درمیان دوستی پر فخر ہے جب کہ شی جن پنگ کے ساتھ تعلقات باہمی احترام اور دونوں ملکوں کے عوام کے مفادات کی بنیاد پر قائم ہیں۔
ڈونلڈ ٹرمپ کہتے ہیں کہ چینی صدر کے ساتھ ملاقات میں سلامتی، ٹیکنالوجی اور مصنوعی ذہانت سے متعلق امور پر بھی تبادلہ خیال کیا جائے گا۔ آج ہونے والے فیصلے آنے والی دہائیوں میں امن اور خوشحالی کے فروغ میں مددگار ثابت ہوسکتے ہیں۔
امریکی صدر نے مزید کہا کہ وائٹ ہاؤس میں چینی صدر اور ان کے وفد کی میزبانی امریکا کے لیے اعزاز ہے اور دونوں ملکوں کے بہتر مستقبل کے لیے شی جن پنگ کے ساتھ مل کر کام جاری رکھا جائے گا۔
دوسری جانب چینی صدر شی جن پنگ نے امریکی دورے پر خوشی کا اظہار کرتے ہوئے کہا کہ چین امریکا کے ساتھ مل کر کام کرنے کے لیے تیار ہے۔
شی جن پنگ نے مزید کہا کہ وہ صدر ٹرمپ کے ساتھ مل کر دونوں ممالک کے تعلقات کو مزید مضبوط بنانا چاہتے ہیں جب کہ بیجنگ واشنگٹن کے ساتھ تعاون بڑھانے کا خواہاں ہے۔
چینی صدر کے مطابق امریکا اور چین کے مفادات ایک دوسرے سے جڑے ہوئے ہیں، اس لیے دونوں ممالک کے درمیان تعاون اور رابطے کو مزید آگے بڑھانا ضروری ہے۔
