پاکستان نے تین ملکی ون ڈے سیریز کے افتتاحی مقابلے میں سری لنکا کو فتح کے لیے 306 رنز کا ہدف دے دیا۔ راولپنڈی کرکٹ اسٹیڈیم میں کھیلے جانے والے میچ میں سری لنکا نے ٹاس جیت کر پاکستان کو پہلے بیٹنگ کی دعوت دی۔

پاکستانی اننگز کا آغاز اچھا نہ رہا اور صائم ایوب صرف 7 رنز بنا کر آؤٹ ہوگئے، جبکہ فخر زمان 16 رنز بنا کر پویلین واپس لوٹ گئے۔ ابتدائی وکٹیں گرنے کے بعد بابر اعظم نے اننگز کو سنبھالنے کی کوشش کی، تاہم وہ 45 رنز بنا کر آؤٹ ہوگئے۔

میچ سے قبل پاکستان کے کپتان شاہین آفریدی نے کہا کہ وکٹ تازہ ہے اور اگر پاکستان ٹاس جیتتا تو بھی پہلے بیٹنگ کرنے کا فیصلہ کرتا۔ ان کا کہنا تھا کہ ٹیم کی کوشش ہوگی کہ 300 رنز کا مجموعہ حاصل کیا جائے۔

شاہین آفریدی نے بتایا کہ وکٹ کیپر بیٹر سعد بیگ اس میچ میں پاکستان کی جانب سے ون ڈے انٹرنیشنل کرکٹ میں ڈیبیو کر رہے ہیں۔

افتتاحی میچ کے لیے پاکستان کی پلیئنگ الیون میں کپتان شاہین آفریدی، سعد بیگ، صائم ایوب، فخر زمان، بابر اعظم، حسن نواز، سلمان علی آغا، عرفات منہاس، فہیم اشرف، نسیم شاہ اور حارث رؤف شامل ہیں۔

تین ملکی سیریز میں پاکستان اور سری لنکا کے علاوہ انگلینڈ کی ٹیم بھی حصہ لے رہی ہے، جس کے باعث ایونٹ میں تینوں ٹیموں کے درمیان دلچسپ مقابلوں کی توقع ہے۔