حالیہ برسوں میں دیسی جڑی بوٹیوں اور متبادل طب کے علاج کے طریقے دوبارہ سے مقبول ہو رہے ہیں، خاص طور پر جب لوگ جدید دواؤں کے مضر اثرات سے بچنے اور قدرتی طریقوں سے شفاء پانے کی طرف مائل ہو رہے ہیں۔
دیسی جڑی بوٹیوں کی طب صدیوں سے مختلف بیماریوں کے علاج میں استعمال ہو رہی ہے، اور اب جدید تحقیق بھی ان کے فوائد کو تسلیم کر رہی ہے۔
تاریخی پس منظر
دیسی جڑی بوٹیاں برصغیر پاک و ہند میں صدیوں سے استعمال ہو رہی ہیں، اور آیورویدک اور یونانی طب میں ان کا اہم کردار رہا ہے۔ یہ طب انسانی جسم کی قوت مدافعت کو مضبوط کرنے، بیماریوں سے بچاؤ اور علاج کے لیے جڑی بوٹیوں اور قدرتی اجزاء کا استعمال کرتی ہے۔ اس میں سبز چائے، نیم، تلسی، ہلدی، السی، اور دیگر جڑی بوٹیوں کو خاص اہمیت دی جاتی ہے۔ قدیم دور میں ان جڑی بوٹیوں کے استعمال نے صحت مند زندگی کے قیام میں اہم کردار ادا کیا تھا۔
جڑی بوٹیوں سے علاج، جدید تحقیق کیا کہتی ہے؟
حال ہی میں کی جانے والی کئی تحقیق نے ان قدیم جڑی بوٹیوں کے سائنسی فوائد کی تصدیق کی ہے۔ متعدد سائنسی مطالعات کے مطابق دیسی جڑی بوٹیاں مثلاً ہلدی، ادرک اور نیم میں اینٹی آکسیڈنٹس، اینٹی بیکٹیریل اور اینٹی وائرل خصوصیات پائی جاتی ہیں، جو انہیں قدرتی طور پر موثر بناتی ہیں۔ ہلدی کو خاص طور پر سوزش کو کم کرنے اور جلدی بیماریوں کے علاج کے لیے مفید سمجھا جاتا ہے۔ جبکہ ادرک معدے کی بیماریوں اور نیم جلدی مسائل کے حل کے لیے موثر ثابت ہوا ہے۔
مغربی ممالک میں بھی دیسی جڑی بوٹیوں اور متبادل طبی طریقوں کی مقبولیت میں اضافہ ہو رہا ہے۔ وہاں کے شہری اب قدرتی علاج اور جڑی بوٹیوں پر زیادہ انحصار کر رہے ہیں کیونکہ یہ مضر اثرات سے پاک اور نسبتا سستے ہیں۔ جڑی بوٹیوں کے استعمال کو اب فارماسیوٹیکل انڈسٹری میں بھی اپنایا جا رہا ہے، جہاں ادویات کی تیاری میں جڑی بوٹیوں کے عرق اور دیگر قدرتی اجزاء شامل کیے جا رہے ہیں۔
ماہرین کا نقطہ نظر
ماہرین صحت کے مطابق، دیسی جڑی بوٹیوں کا استعمال مخصوص بیماریوں کے علاج میں فائدہ مند ثابت ہوا ہے۔ ان کا کہنا ہے کہ جڑی بوٹیوں کو متبادل یا معاون علاج کے طور پر استعمال کیا جا سکتا ہے، خاص طور پر جب دوا سے جڑی خطرات اور مضر اثرات کے حوالے سے تشویش پائی جاتی ہیں۔ طبی ماہرین اور غذائی ماہرین بھی دیسی جڑی بوٹیوں کے استعمال کو فروغ دے رہے ہیں کیونکہ یہ جسم کو قدرتی طریقے سے بہتر بناتی ہیں۔
احتیاطی تدابیر
اگرچہ دیسی جڑی بوٹیوں کے فوائد بہت زیادہ ہیں، لیکن انہیں بغیر مشورے کے استعمال کرنا نقصان دہ بھی ہو سکتا ہے۔ ماہرین کا کہنا ہے کہ ان جڑی بوٹیوں کا استعمال ہمیشہ ایک ماہر ڈاکٹر یا حکیم کے مشورے سے کیا جانا چاہیے تاکہ ان کے مضر اثرات سے بچا جا سکے۔
