بیجنگ: چین نے ایک انقلابی فضائی ہتھیار ’’مدرشپ‘‘ تیار کرلیا ہے جو بیک وقت 100 سے زائد ڈرونز لانچ کرنے کی صلاحیت رکھتا ہے۔ یہ بغیر پائلٹ کا دیوہیکل طیارہ ’’جیوتیاں ایس ایس- یو اے وی‘‘ کہلاتا ہے جس کی پہلی پرواز جون 2025 میں متوقع ہے۔
یہ جدید فضائی نظام چین کی دفاعی صلاحیت میں غیر معمولی اضافہ کرے گا اور خاص طور پر بحیرہ جنوبی چین، آبنائے تائیوان اور دیگر حساس علاقوں میں امریکی اثر و رسوخ کے لیے ایک واضح چیلنج بن سکتا ہے۔
جیوتیاں مدرشپ ایک ہائی الٹیٹیوڈ، بغیر پائلٹ فضائی گاڑی ہے جس کا وزن تقریباً 15 ٹن اور پروں کا پھیلاؤ 25 میٹر ہے۔ یہ 15 کلومیٹر کی بلندی تک پرواز کرسکتی ہے اور اس کی رینج 7 ہزار کلومیٹر تک ہے۔ اسے ’’ہائی اسکائی‘‘ یا ’’نائن ہیونز‘‘ کا نام بھی دیا گیا ہے۔
China’s first aerial mothership, Jiutian SS-UAV, is scheduled for its maiden flight in June.
It can cruise at 15,000m high carrying over 100 small drones or 1,000 kg of missiles, with a range of 7,000km.
Don’t worry, China’s military is peace-oriented from the start. We grow… pic.twitter.com/koCXA4uq6g
— Li Zexin (@XH_Lee23) May 18, 2025
مدرشپ کا سب سے نمایاں پہلو اس کی ’’سوارم ٹیکنالوجی‘‘ ہے جو ایک وقت میں درجنوں ڈرونز کو مربوط انداز میں ہدف کی سمت روانہ کرتی ہے۔
یہ ڈرونز ایف پی وی ٹیکنالوجی اور مصنوعی ذہانت کے ذریعے مربوط حملوں کے لیے استعمال ہوں گے جو دشمن کے فضائی و زمینی دفاعی نظام کو مکمل طور پر مفلوج کرسکتے ہیں۔
یہ طیارہ نہ صرف حملہ آور مشن بلکہ جاسوسی، نگرانی، الیکٹرانک وارفیئر اور کارگو ٹرانسپورٹ کے مقاصد کے لیے بھی استعمال کیا جا سکے گا۔
اس کی پے لوڈ کی صلاحیت 6 ٹن تک ہے جس میں جدید سینسرز، ہتھیار اور خودکار چھوٹے ڈرونز شامل کیے جاسکتے ہیں۔
اس اسٹیلتھ ٹیکنالوجی سے لیس مدرشپ کو چین کے ایوی ایشن انڈسٹری کارپوریشن نے دیگر ملکی دفاعی اداروں کے اشتراک سے تیار کیا ہے اور ماہرین کے مطابق یہ امریکا کے ایم کیو-9 ریپر جیسے ڈرون سسٹمز کے لیے ایک سنجیدہ چیلنج ثابت ہوسکتا ہے۔
چینی دفاعی ماہرین کا کہنا ہے کہ مدرشپ کی طویل رینج، بلندی پر پرواز، اے آئی سے لیس کنٹرول اور سوارم ٹیکنالوجی اسے متنازع علاقوں میں طاقت کے مظاہرے کا جدید ہتھیار بناتے ہیں۔
