پاکستان کرکٹ ٹیم کے سابق مایہ ناز فاسٹ بولروہاب ریاض کا خیال ہے کہ سرفراز احمد ان تیز ترین کپتانوں میں سے ایک ہیں جن کے تحت وہ کھیل چکے ہیں۔

وہاب ریاض، جو 2008 میں ڈیبیو کرنے کے بعد مختلف کپتانوں کے ماتحت کھیل چکے ہیں، نے یہ بھی کہا کہ مصباح الحق ٹیم کے سب سے زیادہ سمجھدار سوچ رکھنے والے لیڈر تھے۔

انہوں نے کہا کہ دیکھو، کپتانی الگ چیز ہے۔ میں نے شعیب ملک کی کپتانی میں کھیلا پھر شاہد آفریدی کی کپتانی میں، مصباح کی کپتانی میں اور سرفراز احمد کی کپتانی میں۔ میرے خیال میں ان سب میں سے ایک تیز ترین کپتان سرفراز تھا۔

سابق کھلاڑی نے کہا کہ اور میرے خیال میں سب سے زیادہ سمجھدار سوچ رکھنے والے کپتان مصباح الحق تھے جب کہ شعیب بھائی اور شاہد ایسے تھے جو کھلاڑیوں کو بہت سپورٹ کرتے تھے۔

38 سالہ تیز گیند باز نے بھی بابر اعظم کی قیادت میں کھیلنے کے بارے میں اپنے خیالات کا اظہار کرتے ہوئے کہا کہ انہیں اپنی قیادت میں زیادہ کھیلنے کو نہیں ملا۔

یہ بھی پڑھیں: بارش کے پانی میں تیز گاڑی چلانے پر وہاب ریاض کو صارفین نے آرے ہاتھوں لے لیا

وہاب ریاض نے کہا کہ مجھے بابر کے ساتھ بہت کم وقت ملا۔ ظاہر ہے، وہ اس وقت اپنے سیکھنے کے مرحلے میں تھا لیکن مجھے لگتا ہے کہ اگر مجھے کسی کی درجہ بندی کرنی ہے تو میں کہوں گا کہ سرفراز بہترین کپتانوں میں سے ایک تھے۔

واضح رہے کہ سرفراز احمد کو کپتانی سے ہٹائے جانے کے بعد بابر کو 2020 میں پاکستان کا کپتان مقرر کیا گیا تھا۔