بھارت نے دفاعی چیمپئن سری لنکا کو ایشیا کپ 2023 کے فائنل میں بدترین شکست دے کر ریکارڈ آٹھویں مرتبہ ٹائٹل اپنے نام کرلیا۔
کولمبو میں کھیلے گئے ایشیا کپ کے فائنل میں محمد سراج نے سری لنکن بیٹنگ لائن کے پرخچے اڑادیے اور پوری ٹیم 16ویں اوور میں صرف 50 رنز بنانے کے بعد آؤٹ ہوگئی۔
ہدف کے تعاقب میں بھارتی کپتان روہت شرما نے خود اننگز کا آغاز کرنے کے بجائے شبمن گل کے ساتھ ایشان کشن کو بھیجا جنہوں نے 51 رنز کا ہدف بآسانی 6.1 اوورز میں پورا کرلیا۔
𝘾𝙃𝘼𝙈𝙋𝙄𝙊𝙉𝙎 🏆
India storm to victory in the #AsiaCup2023 Final against Sri Lanka 🔥
📝: https://t.co/UROMhx0HTs pic.twitter.com/X4OOrGDJ6H
— ICC (@ICC) September 17, 2023
بھارت کی جانب سے شبمن گل 27 اور ایشان کشن 23 رنز بناکر ناقابل شکست رہے اور یوں بھارت نے سری لنکا کو 10 وکٹوں کی بدترین شکست سے دوچار کرتے ہوئے ریکارڈ سب سے زیادہ 8 بار ایشیا کپ کا ٹائٹل اپنے نام کیا۔
اس سے قبل فائنل میں سری لنکا نے بھارت کے خلاف ٹاس جیت کر پہلے بیٹنگ کا فیصلہ کیا جو بالکل غلط ثابت ہوا۔ فائنل میں سری لنکا کی بیٹنگ بارش کے سبب تاخیر سے شروع ہوئی لیکن میچ کا آغاز ہوتے ہی سری لنکن بیٹنگ لائن ڈگمگاگئی۔
سری لنکا کے ابتدائی 6 بیٹرز صرف 12 رنز پر پویلین لوٹ گئے تھے۔ بھارت کے بولر محمد سراج نے تباہ کن بولنگ کرتے ہوئے 21 رنزدے کر 6 وکٹیں لیں۔ اس دوران انہوں نے ایک اوور میں 4 کھلاڑیوں کو پویلین کی راہ دکھاکر منفرد ریکارڈ بھی اپنے نام کیا۔
سری لنکا کے 9 کھلاڑی ڈبل فیگر میں بھی داخل نہ ہوسکے، سری لنکا کےکوشل مینڈس 17 رنز بنا کر نمایاں رہے، سری لنکا کے پانچ کھلاڑی صفرپرآوٹ ہوئے۔ بھارت کی جانب سے ہاردک پانڈیا نے 3 کھلاڑی آؤٹ کیے اور ایک وکٹ جسپرت بمراہ کے حصے میں آئی۔
