پاکستان کرکٹ ٹیم کے نوجوان فاسٹ بولر نسیم شاہ نے ورلڈکپ اسکواڈ میں شامل نہ ہونے پر افسردگی کا اظہار کیا ہے۔
قومی ٹیم کے چیف سلیکٹر اور سابق کپتان انضمام الحق نے بھارت میں ہونے والے ورلڈکپ کے لیے پاکستان کرکٹ ٹیم کا اعلان کیا جس میں نوجوان فاسٹ بولر نسیم شاہ کو انجری کی وجہ سے اسکواڈ میں شامل نہیں کیا گیا۔
چیف سلیکٹر کا کہنا تھا کہ نسیم شاہ کا اسکواڈ میں شامل نہ ہونا قومی ٹیم کے لیے دھچکا ہے، نسیم شاہ کی جگہ تجربہ کار فاسٹ بولر حسن علی کو 15 رکنی ٹیم میں شامل کیا گیا ہے۔
بعد ازاں نسیم شاہ نے سوشل میڈیا ایپ ’ایکس‘ پر قومی ٹیم کے اعلان کے بعد اپنا بیان جاری کرتے ہوئے کہا کہ بوجھل دل کے ساتھ شیئر کر رہا ہوں کہ میں ورلڈ کپ کا حصہ نہیں ہوں گا لیکن میرا یقین ہے کہ یہ سب اللہ کے ہاتھ میں ہے۔
With a heavy heart, I'm sharing that I will not be part of this amazing team that will be representing our beloved country. While I'm disappointed, I believe everything is in Allah's hands. InshahAllah will be on the field very soon.
Thank you to all my fans for the prayers!
— Naseem Shah (@iNaseemShah) September 22, 2023
نوجوان فاسٹ بولر نے مزید لکھا کہ ان شااللہ بہت جلد دوبارہ میدان میں ہوں گا، مداحوں کا بے حد شکریہ جنہوں نے مجھے دعاؤں میں یاد رکھا۔
خیال رہے کہ نسیم شاہ ایشیا کپ کے دوران بھارت کے خلاف میچ میں انجری کا شکار ہوکر ایونٹ سے باہر ہوگئے تھے اور انہوں نے بھارت کے خلاف میچ میں بھی اپنے اوورز پورے نہیں کیے تھے۔
