جنوبی افریقہ سے تعلق رکھنے والے معروف پیرا اولمپئین ایتھلیٹ آسکر پسٹوریئس کو پیرول پر رہا کر دیا گیا ہے۔

برطانوی خبر رساں ادارے کی خبر کے مطابق سابق ایتھلیٹ آسکر پسٹوریئس کو اپنی گرل فرینڈ ریوا سٹین کیمپ کے قتل کے تقریبا 11 سال بعد جنوبی افریقہ کی جیل سے پیرول پر رہا کر دیا گیا ہے۔

حکام نے تصدیق کی ہے کہ پسٹوریئس جمعے کی صبح گھر پر تھے اور انہوں نے اپنی 13 سال سے زائد سزا کا نصف حصہ کاٹ لیا تھا۔

اسٹین کیمپ کی والدہ کا کہنا تھا کہ انہوں نے سابق ایتھلیٹ کو رہا کرنے کے فیصلے کو قبول کر لیا ہے لیکن ان کا خاندان عمر قید کی سزا کاٹ رہا ہے۔

37 سالہ پیرا اولمپک ایتھلیٹ آسکر پسٹوریئس نے 2013 میں سٹین کیمپ کو اپنے گھر میں گولی مار دی تھی، ان کا دعویٰ تھا کہ انہوں نے چور سمجھ کر گولی چلائی تھی۔

پیرا اولمپئین ایتھلیٹ آسکر پسٹوریئس کو بالآخر 2015 میں قتل کا مجرم قرار دیا گیا تھا جب ایک اپیل عدالت نے غیر ارادی قتل کے پہلے کے فیصلے کو کالعدم قرار دیا تھا۔

جنوبی افریقہ کے قانون کے تحت تمام مجرموں کو پیرول پر رہا کرنے کا حق حاصل ہے، جس کا مطلب ہے کہ کچھ شرائط کے تحت جلد رہائی، ایک بار جب وہ اپنی آدھی سزا پوری کر لیتے ہیں، جو آخر کار پسٹوریئس کے لیے 13 سال اور پانچ ماہ مقرر کیا گیا تھا۔

2029 میں ان کی سزا ختم ہونے تک وہ سخت قوانین کے تحت رہیں گے ، انہیں دن کے مخصوص گھنٹوں کے لئے گھر تک محدود رکھنے کے ساتھ ساتھ شراب پینے پر بھی پابندی ہوگی اور انہیں میڈیا سے بات کرنے کی بھی اجازت نہیں ہے۔

اس کے علاوہ، پسٹوریئس کو صنفی بنیاد پر تشدد اور غصے کے ارد گرد کے مسائل سے نمٹنے میں مدد کے لئے تھراپی کی ضرورت ہوگی.

خیال کیا جاتا ہے کہ وہ دارالحکومت پریٹوریا کے مضافاتی علاقے میں اپنے چچا آرنلڈ پسٹوریئس کے گھر میں رہنے گئے تھے۔

جنوبی افریقی صحافی کیرین موغان کی جانب سے پیش کردہ قانونی دستاویزات کے مطابق جیل میں پسٹوریئس ٹریکٹر چلایا کرتے تھے اور لائبریری میں کام کرتا تھا اور قیدیوں کی کوٹھریوں کی صفائی کرتا تھا۔