پی ایس ایل 9 کے دوسرے میچ میں کوئٹہ گلیڈی ایٹرز نے پشاور زلمی کو 16 رنز سے شکست دے دی۔
لاہور کے قذافی اسٹیڈیم میں پاکستان سپر لیگ کے نویں ایڈیشن کا دوسرا میچ آج پشاور زلمی اور کوئٹہ گلیڈی ایٹرز کے درمیان کھیلا گیا جس میں کوئٹہ گلیڈی ایٹرز نے پہلے بیٹنگ کرتے ہوئے مقررہ 20 اوورز میں 206 رنز بنائے تاہم پشاور زلمی 6 وکٹ کے نقصان پر 190 رنز ہی بناسکی۔
Mohammad Amir delivered the killer blow ⚡#HBLPSL9 | #KhulKeKhel | #QGvPZ pic.twitter.com/AzgZH8DCW7
— PakistanSuperLeague (@thePSLt20) February 18, 2024
کوئٹہ بیٹنگ
پشاور زلمی کے کپتان بابراعظم نے کوئٹہ گلیڈی ایٹرز کے خلاف ٹاس جیت کر پہلے بولنگ کا فیصلہ کیا۔
کوئٹہ گلیڈی ایٹرز کی جانب سے جیسن روئے اور سعود شکیل نے اننگز کا آغاز کیا دونوں بلے بازوں نے ٹیم کو بہترین آغاز فراہم کرتے ہوئے 157 رنز کی شراکت قائم کی۔ اس دوران دونوں اوپنرز نے اپنی نصف سنچریاں مکمل کیں۔
سعود شکیل نے 47 گیندوں پر 74 رنز کی اننگز کھیلی جس میں 4 چھکے اور 6 چوکے شامل تھے جب کہ جیسن روئے نے 48 گیندوں پر 75 رنز بنائے جس میں 2 چھکے اور 9 چوکے شامل تھے۔ کپتان ریلی روسو نے 14 اور شرفن رتھرفورڈ نے 20 رنز بنائے۔
Turning point of the match❓#HBLPSL9 | #KhulKeKhel | #QGvPZ pic.twitter.com/Ae9JgFqlA2
— PakistanSuperLeague (@thePSLt20) February 18, 2024
پشاور زلمی کی جانب سے سلمان ارشاد نے 3، محمد ذیشان اور لک ووڈ نے ایک ایک وکٹ حاصل کی۔
پشاور بیٹنگ؛
پشاور زلمی کی جانب سے کپتان بابراعظم اور صائم ایوب نے ٹیم کو اچھا آغاز فراہم کیا ، انہوں نے 91 رنز کی شراکت قائم کی جس میں صائم ایوب نے 3 چھکوں اور 2 چوکوں کی مدد سے 26 گیندوں پر 42 رنز بنائے۔
کپتان بابراعظم نے اپنی فارم کو جاری رکھتے ہوئے نصف سنچری اسکور کی ، وہ 42 گیندوں پر 68 رنز کی اننگز کھیل کر آؤٹ ہوئے تاہم بعد میں آنے والے بلے باز ناکام ثابت ہوئے۔
محمد حارث 7، ٹام کوہلر کوڈمور 18، رومن پاول 17 اور ڈان موسلی نے 11 رنز بنائے۔
کوئٹہ گلیڈی ایٹرز کی جانب سے ابرار احمد نے 2، محمد وسیم، محمد عامر اور عقیل حسین نے ایک ایک وکٹ حاصل کی۔
پاکستان سپر لیگ کے نویں ایڈیشن میں آج دوسرا میچ ملتان سلطانز اور کراچی کنگز کی ٹیموں کے درمیان ملتان کرکٹ اسٹیڈیم میں کھیلا جائے گا۔
واضح رہے کہ گزشتہ روز ایونٹ کے افتتاحی میچ میں اسلام آباد یونائیٹڈ نے لاہور قلندرز کو 8 وکٹوں سے شکست دی تھی۔
