کھجور توانائی سے بھرپور پھل ہونے کے ساتھ اور غذائیت کا بیش بہا خزانہ ہے، جو دنیا بھر میں مختلف اقسام میں دستیاب ہے۔ اس کا ذائقہ، رنگ، شکل اور غذائی فوائد مختلف اقسام میں بدلتے ہیں، جیسے کہ سیاہ کھجور ، عجوہ، چھوہارے اور کھجی وغیرہ ۔
نرم اور میٹھی کھجور میں قدرتی شکر، فائبر، پوٹاشیم اور دیگر معدنیات کثیر مقدار میں موجود ہوتے ہیں یہی وجہ ہے کہ فوری توانائی بہال کرنے میں اس کا کوئی ظانی نہیں ہے اس میں موجود فائبر نظامِ ہاضمہ کو بہتر بنانے اور قبض سے بچاؤ میں مددگار ثابت ہو سکتا ہے جبکہ پوٹاشیم بلڈ پریشر کو معمول پر رکھنے میں کردار ادا کرتا ہے۔
کھجور قدرتی شکر اور کاربوہائیڈریٹس کی بدولت جسم کو توانائی فراہم کرتی ہے۔ تاہم اس میں آئرن کی مقدار عموماً اتنی زیادہ نہیں ہوتی کہ اسے خون کی کمی کا مؤثر علاج قرار دیا جا سکے۔
اسی طرح ذیابیطس کے مریضوں کو بھی اس کا استعمال مقدار کو مدنظر رکھتے ہوئے کرنا چاہیے کیونکہ کھجور میں قدرتی شکر موجود ہوتی ہے۔
کھجی کے غذائی فوائد
کھجی عموماً زرد رنگ کی اور نسبتاً خشک ہوتی ہے۔ اس میں موجود قدرتی شکر اور کاربوہائیڈریٹس جسم کو فوری توانائی فراہم کر سکتے ہیں۔ یہی وجہ ہے کہ اسے جسمانی سرگرمیوں میں مصروف افراد اور اضافی کیلوریز حاصل کرنے کے خواہش مند لوگوں کی غذا میں شامل کیا جا سکتا ہے۔
کھجور کی مختلف اقسام میں کیلشیم اور فاسفورس سمیت متعدد معدنیات پائے جاتے ہیں، جو ہڈیوں کی صحت کے لیے اہم ہیں تاہم ان اجزا کی مقدار قسم اور تیاری کے طریقے کے مطابق مختلف ہو سکتی ہے۔
کھجی کو جوڑوں کے درد، سوزش یا بالوں کے مسائل کا باقاعدہ علاج سمجھنے کے لیے کافی سائنسی شواہد موجود نہیں ہیں۔
صحت کے لیے کون سا انتخاب بہتر ہے؟
غذائی ماہرین کے عمومی اصولوں کے مطابق دونوں اقسام متوازن غذا کا حصہ بن سکتی ہیں۔ اگر مقصد فائبر کا حصول اور قبض سے بچاؤ ہے تو ایسی کھجور منتخب کی جا سکتی ہے جس میں فائبر مناسب مقدار میں موجود ہو۔ دوسری جانب، زیادہ توانائی اور اضافی کیلوریز کی ضرورت رکھنے والے افراد کے لیے خشک کھجور یا کھجی مفید انتخاب ہو سکتی ہے۔
البتہ ذیابیطس کے مریضوں کو دونوں اقسام کی مقدار پر توجہ دینی چاہیے جبکہ خون کی کمی کے شکار افراد کو صرف کھجور پر انحصار کرنے کے بجائے ڈاکٹر کے مشورے سے مناسب علاج اور آئرن سے بھرپور غذائیں استعمال کرنی چاہییں۔
کھجور کھانے کا درست طریقہ
کھجور کو رات بھر پانی یا دودھ میں بھگو کر کھانا ایک عام غذائی طریقہ ہے جس سے یہ نرم ہو جاتی ہے اور بعض افراد کے لیے چبانا آسان ہو جاتا ہے تاہم اسے بھگونے سے غذائی اجزا کے جسم میں جذب ہونے کی رفتار بڑھنے یا جسم کی گرمی کم ہونے کے دعوؤں کے لیے مضبوط سائنسی شواہد موجود نہیں ہیں۔
ماہرین کے مطابق کھجور اور کھجی دونوں کو مناسب مقدار میں روزمرہ غذا کا حصہ بنایا جا سکتا ہے۔ بہتر انتخاب وہی ہے جو فرد کی غذائی ضروریات، صحت کی کیفیت اور مجموعی خوراک کے مطابق ہو۔
