مشہور فیشن برانڈ شینیل کے فیشن شو ’’ریزارٹ 2027‘‘ میں ایک ایسا منفرد اور غیر روایتی ڈیزائن پیش کیا گیا ہے جس نے سوشل میڈیا پر ہلچل مچا دی ہے۔
اس شو میں ماڈلز ایسے ہیلز نما سینڈلز پہن کر ریمپ پر آئیں جن میں پاؤں کا نچلا حصہ بغیر تلوے کا تھا جبکہ صرف ٹخنے کے گرد ایک باریک سی پٹی موجود تھی۔ اس غیر معمولی ڈیزائن نے دیکھنے والوں کو حیران بھی کیا اور بحث پر بھی مجبور کر دیا۔
سوشل میڈیا پر اس ڈیزائن کے حوالے سے ملا جلا ردعمل سامنے آیا ہے بہت سے صارفین نے اسے غیر ضروری اور عجیب قرار دیا جبکہ کچھ نے اسے جدید فیشن میں ایک تخلیقی تجربہ کہا۔
کئی لوگوں کا کہنا تھا کہ یہ جوتے عملی استعمال کے قابل نہیں جبکہ دیگر کے مطابق یہ ڈیزائن فیشن کی حدود کو آگے بڑھاتا ہے ان منفرد سینڈلز کی قیمت تقریباً 1500 ڈالرز (تقریباً 4 لاکھ 18 ہزار پاکستانی روپے) بتائی گئی ہے۔
فیشن ماہرین کے مطابق اس طرح کے ڈیزائن عام استعمال کے لیے نہیں بلکہ ریمپ اور نمائش کے لیے تیار کیے جاتے ہیں جن کا مقصد نئی سوچ اور تخلیقی تصور کو پیش کرنا ہوتا ہے۔
شینیل کا یہ ڈیزائن بھی اسی رجحان کی عکاسی کرتا ہے جہاں سادگی، آزادی اور تصوراتی فیشن کو اجاگر کیا جاتا ہے۔
ماہرین کے مطابق آج کل فیشن انڈسٹری میں جوتوں کے ڈیزائن زیادہ علامتی اور کم عملی ہوتے جا رہے ہیں۔
آخر میں یہی سوال رہ جاتا ہے کہ کیا یہ ڈیزائن روزمرہ زندگی کا حصہ بن سکتے ہیں؟ شاید نہیں، لیکن فیشن کی دنیا میں ہر چیز کا مقصد پہننا نہیں ہوتا بلکہ سوچ پیدا کرنا بھی ہوتا ہے اور اس لحاظ سے یہ ڈیزائن کامیاب نظر آتا ہے کیونکہ اس نے لوگوں کو بات کرنے پر مجبور کر دیا ہے۔
