پی سی بی نے پاکستان اور افغانستان کے درمیان تین ٹی ٹوئنٹی میچز کی سیریز کے لیے قومی اسکواڈ کا اعلان کردیا جس میں شاداب خان کو کپتان مقرر کیا گیا ہے۔
پاکستان کرکٹ بورڈ (پی سی بی) کی جانب سے افغانستان کے خلاف 3 میچز پر مشتمل ٹی ٹوئنٹی سیریز کے لیے بابراعظم، محمد رضوان، فخرزمان، شاہین آفریدی اور حارث رؤف کو آرام دیا گیا ہے اور زیادہ تر نئے کھلاڑیوں کو موقع فراہم کیا گیا ہے جب کہ عماد وسیم اور اعظم خان کی اسکواڈ میں واپسی ہوئی ہے۔
ٹی ٹوئنٹی اسکواڈ
اعلان کردہ اسکواڈ میں عبداللہ شفیق، اعظم خان، فہیم اشرف،افتخاراحمد، نسیم شاہ، صائم ایوب، شان مسعود،طیب طاہر، زمان خان، احسان اللہ، عماد وسیم، محمد حارث، محمد نواز اور محمد وسیم جونیئر شامل ہیں۔
چیف سلیکٹر کے مطابق ریزرو کھلاڑیوں میں ابرار احمد، حسیب اللہ اور اسامہ میر شامل ہیں۔
اس کے علاوہ افغانستان سے سیریز کے لیے آصف علی، حیدر علی، محمد حسنین اور خوشدل شاہ کو ٹیم میں شامل نہیں کیا گیا ہے۔
🚨 Pakistan squad for T20I series against Afghanistan in Sharjah 🚨#AFGvPAK | #BackTheBoysInGreen pic.twitter.com/gzObBOQ25K
— Pakistan Cricket (@TheRealPCB) March 13, 2023
بابراعظم ہی ٹیم کے کپتان رہیں گے
لاہور میں پریس کانفرنس کرتے ہوئے پی سی بی مینجمنٹ کمیٹی کے چیئرمین نجم سیٹھی نے کہا کہ ہم نے پی ایس ایل میں کارکردگی دکھانے والے کھلاڑیوں کو موق دیا ہے اور اس سیریز کے لیے نوجوان کھلاڑیوں کو موقع دیں گے کیوں کہ ہم نے ورلڈ کپ کی تیاری کرنی ہے، ہمارے کچھ سینئر کھلاڑی 2 سال سے بہت زیادہ کرکٹ کھیل رہے ہیں۔
انہوں نے کہا کہ تمام سینئر کھلاڑیوں کو اعتماد میں لے کر فیصلے کیے ہیں اس پر سب کو اتفاق ہے، ہمیں اب ورلڈکپ کا سوچنا ہے، ابھی سے اسسمنٹ کریں گے تو ابھی سے یہ کام کرنا پڑے گا۔
نجم سیٹھی کا کہنا تھا کہ بابراعظم ہمارا بہترین کپتان ہے، وہ ٹیم کے کپتان برقرار ہیں، جس دن وہ کہیں گے اس پر ان کی کپتانی کا فیصلہ کریں گے، ہمارے سینئر زکھلاڑیوں کو کوئی خطرہ نہیں ان کی جگہ پکی ہے، نئے کھلاڑیوں کو ٹیسٹ کررہے ہیں۔
واضح رہے کہ پاکستان اور افغانستان کے درمیان تین ٹی ٹوئنٹی میچز کی سیریز 24 سے 27 مارچ تک شارجہ میں کھیلی جائے گی۔
