ایشین کرکٹ کونسل کی جانب سے ایشیا کپ 2023 کے سری لنکا میں ہونے والے سپر فور مرحلے کے مقام میں تبدیلی کا عندیہ دیا گیا ہے۔

بھارتی میڈیا کی رپورٹس کے مطابق ایشین کرکٹ کونسل (اے سی سی) کولمبو میں موسلا دھار بارش کے پیش نظر ایشیا کپ کے سپر فور میچوں کے مقام میں تبدیلی پر غور کر رہی ہے۔ سپر فور کے پانچ میچ اور فائنل 9 ستمبر سے کولمبو میں شیڈول ہیں، لیکن موسم میں نرمی کے کوئی آثار نظر نہیں آرہے ہیں۔

بھارتی میڈیا کا کہنا ہے کہ موسلادھار بارش کے تناظر میں اے سی سی اس وقت سری لنکا کرکٹ (ایس ایل سی) اور ٹورنامنٹ کے میزبان پاکستان کرکٹ بورڈ (پی سی بی) کے ساتھ وینیو کی ممکنہ تبدیلی کے بارے میں بات چیت میں مصروف ہے۔

اے سی سی کے پاس حتمی فیصلہ کرنے کے لئے مزید دو دن ہیں کیونکہ کولمبو مرحلہ 9 ستمبر کو ہی شروع ہوگا۔

بھارتی میڈیا کا دعویٰ ہے کہ ممکنہ تبدیلی کے لیے تین مقامات پر غور کیا جا رہا ہے جن میں پالیکیلے، دمبولا اور ہمبنٹوٹا شامل ہیں۔

ایونٹ میں حصہ لینے والی چھ ٹیموں کو مقام میں ممکنہ تبدیلی کے بارے میں بھی آگاہ کردیا گیا ہے۔

پالی کیلے اس وقت ایشیا کپ لیگ میچوں کی میزبانی کر رہا ہے لیکن اس پہاڑی قصبے میں بارش کا امکان بھی زیادہ ہے۔

دمبولا پالیکیلے سے تقریبا 70 کلومیٹر دور ہے، اور سابق شہر میں بارش کے امکانات بہت کم ہیں۔

تاہم سری لنکن کرکٹ بورڈ کے ایک عہدیدار نے کہا کہ دمبولا کا رنگیری انٹرنیشنل کرکٹ اسٹیڈیم مختصر نوٹس پر اتنے زیادہ میچوں کی میزبانی کے لئے تیار نہیں ہوگا۔

سری لنکا میں اس وقت موسم سب سے زیادہ روشن رہنے کی پیش گوئی کی گئی ہے اور اے سی سی ایشیا کپ کے میچوں کی میزبانی کے لیے مہندا راجا پاکسے انٹرنیشنل کرکٹ اسٹیڈیم کی تیاریوں کا بغور جائزہ لے رہا ہے۔

کولمبو مرحلے کا آغاز 9 ستمبر سے ہوگا تاہم سری لنکن بورڈ ایونٹ کو بارش کے رحم و کرم پر نہیں چھوڑنا چاہتا تھا، اس حوالے سے حتمی فیصلہ کرنے کے لیے اے سی سی کے پاس مزید دو دن کا وقت ہے۔

حالات حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں