بھارت میں جاری آئی سی سی ورلڈکپ میں اپنے اگلے میچ سے پہلے پاکستان کرکٹ ٹیم نے چنئی میں پریکٹس سیشن میں حصہ لیا۔
پاکستان کرکٹ بورڈ کے مطابق ورلڈکپ 2023 میں جنوبی افریقا کے میچ سے قبل چنئی میں ہونے والے پریکٹس سیشن میں ورلڈ کپ اسکواڈ کے 8 اور ریزرو اسکواڈ کے 3 پلیئرز شریک ہوئے تاہم محمد رضوان شاہین آفریدی، حارث روف نے پریکٹس سیشن میں حصہ نہیں لیا۔
پریکٹس سیشن میں بابر اعظم، امام الحق، شاداب خان، افتخار احمد، سلمان علی آغا، فخر زمان، سعود شکیل اور وسیم جونیئر، محمد حارث، زمان خان اور ابرار احمد بھی پریکٹس سیشن میں موجود تھے جب کہ فاسٹ بولر حسن علی، محمد نواز ، اسامہ میر اور عبداللہ شفیق نے بھی آرام کیا۔
خیال رہے کہ پاکستان آئی سی سی ورلڈکپ میں اپنا چھٹا میچ کل جنوبی افریقا کے خلاف بھارت کے شہر چنئی میں کھیلے گا جہاں اپنے پچھلے میچ میں پاکستان کرکٹ ٹیم کو افغانستان کے ہاتھوں 8 وکٹ کی تاریخی شکست ہوئی تھی۔
رواں ورلڈکپ میں پاکستان کے سیمی فائنل میں پہنچنے کے امکانات انتہائی محدود ہوگئے ہیں۔ نیدرلینڈ اور سری لنکا کے خلاف اپنے ابتدائی دو میچز جیتنے کے پاکستان کو بھارت، آسٹریلیا اور افغانستان کے ہاتھوں اپ سیٹ شکست کا سامنا کرنا پڑا تھا۔
Pakistan eyeing winning streak for semi-final qualification
Read more: https://t.co/c93FrOBPuy#PAKvSA | #DattKePakistani | #WeHaveWeWill | #CWC23
— PCB Media (@TheRealPCBMedia) October 26, 2023
اگر پاکستان کو اگلے مرحلے میں رسائی حاصل کرنی ہے تو اس کے لیے قومی ٹیم کو اپنی بقیہ تمام میچز جیتنے پڑیں گے لیکن ساتھ ہی اپنا رن ریٹ بھی بہتر کرنا پڑے گا کیوں کہ اس وقت پاکستان پوائنٹس ٹیبل پر پانچویں نمبر پر موجود ہے۔
آئی سی سی ورلڈکپ کے پوائںٹس ٹیبل پر میزبان بھارت اب تک ناقابل شکست رہتے ہوئے پانچوں میچوں میں کامیابی حاصل کرنے کے بعد 10 پوائنٹس کے ساتھ سرفہرست ہے جب کہ نیوزی لینڈ صرف بھارت کے خلاف ایک شکست کے بعد دوسرے نمبر پر ہے۔ جنوبی افریقا تیسرے اور آسٹریلیا چوتھے نمبر پر موجود ہے۔
