بھارت میں ہونے والے آئی سی سی ورلڈکپ 2023 کے دوران انگلش آل راؤنڈر ڈیوڈ ویلے نے میگا ایونٹ کےبعد انٹرنینشل کرکٹ کو خیرباد کہنے کا اعلان کردیا۔
گزشتہ روز انگلینڈ کے بولنگ آل راؤنڈر ڈیوڈ ویلے نے سوشل میڈیا پر انٹرنیشنل کرکٹ سے ریٹائرمنٹ کا اعلان کرتے ہوئے کہ میں اس ورلڈکپ کے بعد تمام طرز کی انٹرنیشنل کرکٹ کو خیرباد کہہ دوں گا۔
انہوں نے کہا کہ بطور نوجوان ہمیشہ سے انگلینڈ کے لیےکرکٹ کھیلنا میرا خواب رہا ہے اور میں کبھی نہیں چاہتا تھا یہ یہ دن آئے جب مجھے انگلینڈ کے لیے مزید کرکٹ نہ کھیلنے کا فیصلہ کرنا پڑے لیکن بہت غوروخوص اور مشورے کےبعد میں نے حتمی طور پر انٹرنیشنل کرکٹ سے ریٹائرمنٹ کا فیصلہ لیا ہے۔
— David Willey (@david_willey) November 1, 2023
انگلش آل راؤنڈر نے کہا کہ بہت افسوس کے ساتھ مجھے یہ کہنا پڑرہا ہے کہ اب وقت آگیا ہے کہ میں اس ورلڈکپ کے بعد انٹرنیشنل کرکٹ سے ریٹائرڈ ہوجاؤں جب کہ میں نے انگلینڈ کی جرسی بہت فخر کے ساتھ پہنے رکھی اور اس ٹیم کو وہ سب کچھ دیا جس کی مجھ میں صلاحیت تھی۔
انہوں نے کہا کہ میں اس حوالے سے بہت خوش قسمت ہوں کہ مجھے وائٹ بال کرکٹ میں ایسے کھلاڑیوں کے ساتھ کھیلنے کا موقع ملا جو دنیا میں بہترین تسلیم کیے جاتے ہیں اور اس دوران میں نے بہت سے اچھے دوست بھی بنائے اور کچھ حسین لمحات بھی اس ٹیم اور دوستوں کے ساتھ گزارے۔
انگلش آل راؤنڈر نے ورلڈکپ کے دوران ہی کرکٹ سے ریٹائرمنٹ کے فیصلے پر وضاحت دیتے ہوئے کہا کہ میری ریٹائرمنٹ کو انگلینڈ کی میگا ایونٹ میں کارکردگی سے ہرگز نہ جوڑا جائے، یہ میرا ذاتی فیصلہ ہے۔
واضح رہے کہ ڈیوڈ ویلے نے 70 ون ڈے انٹرنیشنل اور 43 ٹی ٹوئنٹی میچز میں انگلینڈ کی نمائندگی کی، اس دوران انہوں نے ون ڈے میں 94 اور ٹی ٹوئنٹی میں 51 وکٹیں حاصل کیں۔ اس کے علاوہ انہوں نے ون ڈے میں 26 کی ایوریج اور 93 کے اسٹرائیک ریٹ سے رنز بھی بنائے۔
