وزیراعلیٰ پنجاب چوہدری پرویز الٰہی کی جانب سے باضابطہ طور پر نگراں وزیراعلیٰ کیلئے تین نام گورنر پنجاب کو ارسال کردیئے گئے ہیں جو بلیغ الرحمان کو موصول ہوگئے ہیں۔

ورنر پنجاب کی جانب سے نگراں وزیراعلیٰ کے ناموں کی سمری موصول ہونے کی تصدیق کردی گئی ہے اور انہوں نے اس حوالے سے ٹوئٹ بھی کی۔

I have received three names from Chief Minister Parvez Ilahi which are being forwarded to Opposition Leader Hamza Shahbaz Sharif. I would like to see both of the leaders jointly agree on any name within stipulated time. pic.twitter.com/MK7Ey6Jqg7

— M Baligh Ur Rehman (@MBalighurRehman) January 16, 2023

گورنر پنجاب نے بتایا ہے کہ مجھے وزیر اعلیٰ پرویز الٰہی کی جانب سے تین نام موصول ہوئے ہیں جو کہ اپوزیشن لیڈر حمزہ شہباز شریف کو بھیجے جا رہے ہیں۔

انہوں نے مزید کہا کہ میں چاہتا ہوں کہ دونوں رہنما مقررہ وقت کے اندر کسی بھی نام پر مشترکہ طور پر متفق ہوں۔

اس سے قبل مونس الٰہی نے اپنے ایک پیغام میں آگاہ کیا ہے اور سمری بھی شیئر کی ہے۔

Sent as instructed and announced . pic.twitter.com/AAY9f0wvfo

— Moonis Elahi (@MoonisElahi6) January 16, 2023

انہوں نے بتایا ہے کہ چوہدری پرویز الٰہی نے نگراں وزیراعلیٰ کیلئے 03 نام باضابطہ طور پر گورنر پنجاب کو بھیج دیئے جس میں سردار احمد نواز سوکھیرا، ناصر محمود کھوسہ، محمد نصیر خان کے نام شام ہیں۔

یہ بھی پڑھیں: نگراں وزیراعلیٰ پنجاب کا تقرر، ن لیگ کا مختلف ناموں پر غور

خیال رہے کہ اس سے قبل گزشتہ روز وزیر اعلیٰ پنجاب چوہدری پرویز الٰہی نے زمان پارک میں چیئرمین پاکستان تحریک انصاف عمران خان سے ملاقات کے بعد میڈیا سے گفتگو کرتے ہوئے کہا کہ عمران خان سے نگران وزیر اعلیٰ کے ناموں پر مشاورت ہوئی ہے، ہم نے گورنر پنجاب کو نگراں وزیر اعلیٰ کیلئے تین نام دینے ہیں۔

انہوں نے کہا کہ عمران خان سے مشاورت کے بعد نگراں وزیر اعلیٰ کے لئے تین نام احمد نواز سکھیرا، نصیر احمد خان، ناصر سعید کھوسہ پر اتفاق کیا گیا ہے اور ہم یہ تینوں نام نگراں وزیر اعلیٰ کیلئے گورنر کو بھجوا رہے ہیں۔

ان کا کہنا تھا کہ اپوزیشن کھلے دل سے سوچے تو ان میں سے ایک نام پر اتفاق ہوتا ہوا نظر آرہا ہے۔

ان کا یہ بھی کہنا تھا کہ کل پارٹی کے عہدیداروں کی میٹنگ بلائی ہے، سینیٹر کامل علی آغا بھی شرکت کریں اور اس میٹنگ میں اہم مشاورت کی جائے گی۔

دوسری جانب پاکستان مسلم لیگ ن کے قائد نواز شریف کی زیر صدارت پارٹی کی سینئر قیادت کا اہم مشاورتی اجلاس منعقد ہوا جس میں  پنجاب میں نگراں وزیراعلیٰ کے ناموں پر غور کیا گیا۔

پارٹی ذرائع نے بتایا کہ مسلم لیگ ن نے نگراں وزیراعلیٰ کے لئے مختلف ناموں پر مشاورت کی اور وزیر اعلیٰ پنجاب سے بھی مشاورت کا فیصلہ کر لیا۔

ذرائع نے بتایا کہ پارٹی کے مشاورتی اجلاس میں فیصلہ کیا گیا کہ مسلم لیگ ن نگراں وزیر اعلیٰ پنجاب کی تعیناتی کے لئے مشاورتی عمل کا حصہ بنے گی۔