پاکستان تحریک انصاف (پی ٹی آئی) کے سینئر رہنما فواد چوہدری نے کہا ہے کہ شہباز شریف اور بلاول بھٹو نے بین الاقوامی سطح پر پاکستان کی جگ ہنسائی میں کبھی کوئی کسر نہیں چھوڑی۔
سماجی رابطے کی ویب سائٹ ٹوئٹر پر اپنے جاری کردہ بیان میں فواد چوہدری نے وزیراعظم شہباز شریف کے دورہ ترکیہ سے متعلق بات کرتے ہوئے کہا کہ اس فیصلے کیلئے کتنی عقل چاہیے کہ ترکی کی حکومت اور عوام شدید صدمے میں ہیں۔
شہبازشریف اوربلاول نے بین الاقوامی سطح پر پاکستان کی جگ ہنسائ میں کبھی کوئ کسر نہیں چھوڑی اس فیصلے کیلئے کتنی عقل چاہئے کہ ترکی کی حکومت اور عوام شدید صدمے میں ہیں ابھی ہزاروں لوگ ملبے کے نیچے دبے ہیں وہ اس وقت میزبانی نہیں کرسکیں گے لیکن احمقوں کا یہ ٹولہ زبردست کا مہمان بن گیا https://t.co/eox7FjynU0
— Ch Fawad Hussain (@fawadchaudhry) February 8, 2023
سابق وفاقی وزیر نے کہا کہ ابھی ہزاروں لوگ ملبے کے نیچے دبے ہیں، وہ اس وقت میزبانی نہیں کرسکیں گے لیکن احمقوں کا یہ ٹولہ زبردست کا مہمان بن گیا۔
اس کے علاوہ فواد چوہدری نے اپنے ٹوئٹر پر پی ٹی آئی کے استعفوں کی منظوری سے متعلق کہا کہ اسپیکر تھوڑا سا جمہوریت کا پاس رکھیں اور لیڈر آف اپوزیشن کو تبدیل کرنے کا نوٹیفکیشن جاری کریں۔
اور اس کے ساتھ ہی اسپیکر تھوڑاسا جمہوریت کا پاس رکھیں اور لیڈر آف اپوزیشن کو تبدیل کرنے کا نوٹیفیکیشن جاری کریں ہر بات کیلئے عدالت جانا کوئ اچھی پارلیمانی روائیت نہیں https://t.co/u9IHwUu1TT
— Ch Fawad Hussain (@fawadchaudhry) February 8, 2023
پی ٹی آئی رہنما فواد چوہدری نے مزید کہا کہ ہر بات کیلئے عدالت جانا کوئی اچھی پارلیمانی روائیت نہیں۔
خیال رہے کہ لاہورہائی کورٹ نے پی ٹی آئی کے 43 ارکان اسمبلی کے استعفے منظور کرنے کا حکم معطل کردیا۔
اسپیکر قومی اسمبلی کی جانب سے تحریک انصاف کے 43 ایم این اے کے استعفی منظور کرنے کے اقدام کو چیلنج کیا گیا تھا۔
عدالت نے 43 حلقوں میں ضمنی الیکشن تاحکم ثانی روک دیا اور الیکشن کمیشن سمیت دیگر فریقین کو نوٹس جاری کرتے ہوئے جواب طلب کر لیا۔
پی ٹی آئی کے وکیل بیرسٹرعلی ظفر نے کہا کہ استعفے واپس لینے کے بعد اسپیکر کے پاس اختیار نہیں کہ وہ استعفے منظور کریں۔ ممبران اسمبلی کے استعفیٰ منظور کرنا خلاف قانون اور بدنیتی پر مبنی ہے۔ ممبران قومی اسمبلی کے استعفے عدالت عظمی کے طے کردہ قوانین کے برعکس منظور کیے گیے۔
واضح رہے کہ قومی اسمبلی سے استعفوں کی منظوری کے بعد الیکشن کمیشن نے تحریک انصاف کے 43 ارکان قومی اسمبلی کو ڈی نوٹیفائی کردیا تھا۔
