کیوی بظاہر چیکو کی طرح نظر آتا ہے لیکن ذائقے میں یہ اسٹابیری سے ملتا جلتا ہوتا ہے۔

اس پھل کی ابتداء نیوزی لینڈ سے ہوئی ہے اسی لیے اس کا نام نیوزی لینڈ کے ایک ’کیوی‘ نامی پرندے سے منسوب کر کے ’ کیوی پھل‘ رکھا گیا ہے۔

ایک حالیہ تحقیق کے مطابق کیوی پھل کھانے سے چار دنوں کے اندر مزاج میں بہتری لائی جاسکتی ہے۔

جی ہاں، کیوی میں بھرپور مقدار میں وٹامن سی  پایا جاتا ہے۔ وٹامن سی کے متعلق ہمیشہ سے یہ خیال رہا ہے کہ انسانی صحت کی بہتری میں اس کا بڑا کردار ہوتا ہے۔

اب محققین نے بتایا کہ یہ پھل وٹامن سی کے سپلیمنٹ سے زیادہ تیز اور دیرپا وٹامن سی فراہم کرتا ہے۔

محقیقن نے آٹھ ہفتوں تک ایک تحقیق میں وٹامن سی کی کمی کا شکار 155 افراد میں غذاؤں کے اثرات کا جائزہ لیا۔

شرکاء کو تین گروہوں میں تقسیم کیا گیا جس میں ایک کو وٹامن سی سپلیمنٹ، دوسرے کو پلیسیبو (غیر فعال دوا جس کے کوئی اثرات نہیں ہوتے) جبکہ تیسرے گروپ کو روزانہ دو کیوی کھلائے گئے۔

بعد ازاں ان افراد نے اسمارٹ فون سروے کے ذریعے اپنی طبعیت، مزاج اور نیند کے معیار کے ساتھ جسمانی سرگرمی کے متعلق بتایا۔

تحقیق میں بتایا گیا کہ کیوی کے سبب طبعیت اور مزاج میں چار روز کے اندر بہتری دیکھی گئی اور یہ اثر 14 سے 16 روز کے درمیان اپنے کمال کو پہنچا۔

دوسری جانب وٹامن سی سپلیمنٹ کے سبب 12 دنوں میں معمولی سی تبدیلی دیکھی گئی۔

ماہرین کا کہنا ہے کہ یہ تحقیق ہمیں یہ جاننے میں مدد دیتی ہے کہ جو ہم کھاتے ہیں اس کے ہمارے احساسات پر فوری اثرات ہوسکتے ہیں۔