موسم سرما کی ایک ٹھنڈی شام میں گرم چائے کاکپ آپ کو کئی دہائیوں پیچھے لے جاتا ہے کبھی بچپن تو کبھی جوانی کی یادیں اور دوستوں کے ساتھ گزارے ہوئے لمحے آپ کو اپنے سحر میں لے لیتے ہیں
نفسیاتی تحقیق کے مطابق اس کیفیت کو محض ماضی کو یاد کرنا نہیں کہا جا سکتا۔ اسے نوسٹیلجیا کہا جاتا ہے یعنی ماضی سے جڑی ایسی جذباتی کیفیت جس میں انسان کو گزرے ہوئے وقت کی کمی بھی محسوس ہوتی ہے اور اس سے ایک خوشگوار تعلق بھی محسوس ہوتا ہے۔ تحقیق بتاتی ہے کہ نوسٹیلجیا عموماً مثبت جذبات، سماجی تعلق اور زندگی میں معنی کے احساس کو بڑھا سکتا ہے۔
حیرت کی بات یہ ہے کہ انسان عمر کے کسی بھی حصے میں پہنچ جائے بعض یادیں اس کے ذہن میں غیر معمولی طور پر تازہ رہ سکتی ہیں۔ کبھی کوئی خوشبو، پرانا گانا، سرد ہوا، دھوپ یا حتیٰ کہ کسی خاص قسم کی آواز بھی ماضی کا وہ دروازہ کھول دیتی ہے جس کے پیچھے برسوں پرانا بچپن اب بھی موجود ہوتا ہے۔
محققین کے مطابق نوسٹیلجیا ماضی اور حال کے درمیان ایک جذباتی پل بناتا ہے۔ یہ انسان کو یہ احساس دلا سکتا ہے کہ ماضی کا شخص اور آج کا شخص ایک ہی زندگی کا حصہ ہیں۔
بہت سے لوگوں کے لیے سردیوں کا موسم خود نوسٹیلجیا پیدا کرنے والا محسوس ہوتا ہےسرد ہوا، دھند، کمزور دھوپ، گرم کپڑے، چائے اور صبح کی خاموشی جیسے مناظر بعض لوگوں کو اپنے بچپن کی طرف لے جاتے ہیں۔
سائنسی تحقیق میں بھی سردی اور نوسٹیلجیا کے درمیان تعلق سامنے آیا ہے۔ ایک تجربے میں لوگوں نے نسبتاً گرم دنوں کے مقابلے میں سرد دنوں میں زیادہ نوسٹیلجیا محسوس کیا جبکہ دوسرے تجربات میں سرد ماحول اور سرد موسم سے پیدا ہونے والی کیفیت کے ساتھ پرانی یادوں میں اضافہ دیکھا گیا۔
ایک اور تحقیق میں خراب یا ناموافق موسم کو بھی نوسٹیلجیا سے جوڑا گیا۔ محققین کے مطابق مشکل موسم بعض اوقات انسان کو ماضی کی خوشگوار یادوں کی طرف متوجہ کرتا ہے جیسے ماضی کی کوئی محفوظ اور مانوس جگہ ذہنی سکون فراہم کر رہی ہو۔
پرانے کاغذ، لکڑی، چاک، بارش کے بعد مٹی کی خوشبو، سردیوں میں جلنے والے ایندھن یا کسی مخصوص کھانے کی خوشبو انسان کو اچانک بچپن کی کسی جگہ یا واقعے تک پہنچا سکتی ہے۔
تحقیق میں پایا گیا ہے کہ خوشبو سے متحرک ہونے والی خود نوشت یادیں بعض اوقات انسان کو ماضی میں واپس پہنچنے کا زیادہ مضبوط احساس دیتی ہیں۔ خاص طور پر خوشبو سے پیدا ہونے والی کچھ یادیں ابتدائی بچپن سے وابستہ ہوتی ہیں۔
بظاہر ایسا لگتا ہے کہ انسان صرف پرانے دن یاد کر رہا ہے لیکن ماہرین کے مطابق نوسٹیلجیا کا تعلق اس سے کہیں زیادہ گہرا ہوسکتا ہے۔
نفسیاتی تحقیق کے مطابق نوسٹیلجیا انسان میں اپنائیت اور تعلق کا احساس بڑھا سکتا ہے۔ پرانی یادیں ہمیں ان لوگوں، جگہوں اور تجربات سے دوبارہ جوڑتی ہیں جو ہماری زندگی کا حصہ رہے ہیں۔
وہ وقت جب مستقبل ابھی بہت دور تھا، چھوٹی خوشیاں بڑی محسوس ہوتی تھیں، دوستوں کے ساتھ ایک گھنٹہ پورا دن لگتا تھا اور آنے والے کل کی فکر آج کی خوشی پر حاوی نہیں ہوتی تھی۔
نفسیات کے ماہرین کے مطابق نوسٹیلجیا انسان کو اپنے ماضی اور حال کے درمیان تسلسل محسوس کرنے میں مدد دے سکتا ہے۔ یعنی انسان یہ محسوس کرتا ہے کہ آج وہ جہاں ہے اس کے پیچھے اس کا وہی پرانا وجود بھی موجود ہے۔
ضروری نہیں۔ نوسٹیلجیا میں خوشی اور اداسی دونوں شامل ہوسکتے ہیں۔ آپ کسی خوبصورت یاد کو سوچ کر مسکرا سکتے ہیں اور اسی لمحے یہ محسوس کرکے اداس بھی ہوسکتے ہیں کہ وہ وقت دوبارہ نہیں آئے گا۔
اسی لیے ماضی کی یادیں بسا اوقات اتنی طاقتور محسوس ہوتی ہیں۔
تحقیق کے مطابق نوسٹیلجیا مجموعی طور پر مثبت جذبات سے جڑا ہوا ہے اور انسان کے سماجی تعلق، خود اعتمادی اور زندگی میں معنی کے احساس کو تقویت دے سکتا ہے۔
حتیٰ کہ کچھ تحقیق میں یہ بھی دیکھا گیا کہ تنہائی کے دوران نوسٹیلجیا بڑھ سکتا ہے اور پرانی یادیں انسان کو دوبارہ تعلق اور سماجی حمایت کا احساس دلا سکتی ہیں۔
اسی لیے کسی سرد صبح جب دھوپ کچھ ویسی ہی ہو جیسی بچپن میں ہوتی تھی، جب ہوا میں وہی خنکی محسوس ہو یا کسی پرانے گانے کی دھن اچانک سنائی دے تو ذہن برسوں کا فاصلہ چند لمحوں میں طے کرلیتا ہے۔
اور شاید یہی نوسٹیلجیا کی سب سے خوبصورت بات ہے کہ ہم ماضی میں واپس نہیں جاسکتے لیکن ہماری یادیں کبھی کبھی ہمیں وہاں دوبارہ لے جاتی ہیں۔
