یوم پاکستان کے موقع پر منعقدہ پریڈ محدود پیمانے پر روایتی جوش و جذبے سے منانے کا اعلان کیا گیا ہے۔

ذرائع کے مطابق رواں سال 23 مارچ کو یوم پاکستان پریڈ محدود پیمانے پر روایتی جوش و جذبہ کے ساتھ منعقد کی جائے گی، پریڈ کو محدود پیمانے پر منعقد کرنے کا فیصلہ رمضان المبارک کے باعث کیا گیا ہے۔

 یوم پاکستان پریڈ ایوان صدر کے احاطے میں منعقد کی جائے گی جس میں بدستور تینوں مسلح افواج کے دستے بھرپور شرکت کریں گے۔

ذرائع کا کہنا ہے کہ صدر مملکت آصف علی زرداری یوم پاکستان کی تقریب کے مہمان خصوصی ہوں گے، پریڈ میں مسلح افواج کے دستے مہمان خصوصی کو سلامی پیش کریں گے۔

علاوہ ازیں پاک فضائیہ کے لڑاکا طیارے بھی ایوان صدر کے سامنے  فلائی پاسٹ کریں گے جبکہ پریڈ میں پاکستان آرمی کا مایہ ناز پائپ اینڈ پرکشن بینڈ اپنے فن کا بھی مظاہرہ کرے گا۔

ذرائع نے مزید بتایا کہ تقریب میں غیرملکی سفیروں اور دیگر اہم شخصیات کو بھی مدعو کیا گیا ہے۔