مقبول ترین ہالی ووڈ فلم ٹائی ٹینک ریلیز کے 25 سال بعد ایک بار پھر سینما گھروں کی زینت بن گئی۔
ٹائی ٹینک فلم کو 1997 میں ریلیز کیا گیا تھا جو مسلسل 4 ماہ تک سینما میں سب سے زیادہ دیکھی جانے والی فلم بنی تھی۔
اس فلم کی ریلیز کو صدی کا چوتھائی حصہ گزرنے کے بعد اب اسے دوبارہ امریکا سمیت متعدد ممالک کے سینما میں پیش کردیا گیا اور فلم کی ٹیم کی امید ہے کہ فلم ایک بار پھر ریکارڈ کمائی کرنے میں کامیاب جائے گی۔
Marking the anniversary of the film, Titanic: 25 Years Later with @JimCameron will settle the debate once and for all: could Jack have survived? Find out Sunday, February 5 at 9/8c on National Geographic. pic.twitter.com/2SKx5cUagf
— National Geographic TV (@NatGeoTV) January 14, 2023
فلم کے ڈائریکٹر جیمز کیمرون نے فلم کو دوبارہ ریلیز کرنے کے موقع پر پریس کانفرنس کرتے ہوئے کہا کہ اگر اب وہ اسی فلم کو دوبارہ بنائیں گے تو اس میں تھوڑی تبدیلی لائیں گے۔
فلم کو 25 سال مکمل ہوگئے ہیں مگر اب بھی لوگوں کی جانب سے یہ سوال سامنے آتا ہے کہ جب روز (ہیروئین) کو بچایا جاسکتا تھا تو جیک (ہیرو) کو اس تختے پر جگہ دے کر زندہ کیوں نہیں رکھا گیا۔
اسی سوال سے متعلق فلم کے ڈائریکٹر جیمز کیمرون کا کہنا ہے کہ ٹائی ٹینک کے اختتام پر دکھائے جانے والے تختے میں 2 افراد چڑھ کر زندہ نہیں بچ سکتے تھے۔
انہوں نے کہا کہ ہم نے ایک سائنسی تحقیق اس لیے کی تاکہ اس بحث کا خاتمہ ہوسکے، ہم نے ایک ماہر کے ساتھ باقاعدہ فرانزک تجزیہ کیا اور اس بارے میں ہم فروری 2023 میں کچھ خاص ریلیز کرنے والے ہیں۔
ان کا کہنا تھا کہ ہم نے تجزیے کے لیے 2 افراد کی خدمات حاصل کیں جن کا جسمانی حجم کیٹ ونسلیٹ اور لیونارڈو ڈی کیپریو جیسا تھا اور ان کے جسم میں متعدد سنسرز نصب کیے گئے۔
ڈائریکٹر جیمز کیمرون نے بتایا کہ اس کے بعد ہم نے برفانی پانی میں متعدد طریقوں کی آزمائش کر کے یہ جاننے کی کوشش کی کہ وہ دونوں تختے پر زندہ رہ سکتے تھے یا نہیں، نتائج سے واضح ہوا کہ صرف ایک ہی زندہ بچ سکتا تھا۔
ان کا مزید کہنا تھا کہ جیک کو مرنے کی ضرورت تھی، یہ فلم محبت اور قربانی کے گرد گھومتی تھی اور محبت کا پیمانہ قربانی تھی۔
