معروف پاکستانی کامیڈین اور ٹی وی میزبان تابش ہاشمی کو ذو معنی سوال کرنے پر سوشل میڈیا صارفین کی جانب سے تنقید کا سامنا ہے۔
حال ہی میں اداکارہ مریم نفیس نے تابش ہاشمی کے شو میں شرکت کی جہاں معروف کامیڈین نے اُن سے پوچھا کہ پاکستان سپر لیگ (پی ایس ایل) کے میچز ہورہے ہیں تو انہیں کراچی کنگز کیوں پسند نہیں؟
اداکارہ نے کہا کہ انہیں اسلام آباد یونائیٹڈ کے بعد لاہور قلندر اور پھر ملتان سلطانز پسند ہے، انہیں کراچی کنگز پسند نہیں۔
جس پر تابش ہاشمی نے ان سے سوال کیا کہ کراچی کنگز کیوں پسند نہیں؟ جس پر اداکارہ نے کہا کہ بس ایسے ہی ان کی مرضی ہے۔
اس پر میزبان نے مزید اصرار کرتے ہوئے ان سے سوال کیا کہ آخر انہیں کراچی کنگز کیوں پسند نہیں؟ جس پر مریم نے بتایا کہ کیوںکہ کراچی والے پرفارم نہیں کرتے۔
View this post on Instagram
اداکارہ کے جواب پر میزبان نے انہیں کہا کہ ان کے شوہر بھی کراچی سے ہیں، کیا وہ بھی پرفارم نہیں کرتے؟
تابش ہاشمی کے سوال پر مریم نفیس ہنس پڑیں اور شو میں موجود شائقین نے بھی تالیاں بجائیں۔
بعد ازاں میزبان نے وضاحت کرتے ہوئے کہا کہ اداکارہ کے شوہر تو ہدایتکار ہیں، وہ کیوں پرفارم کریں گے؟
اس پر مریم نفیس نے ان کی تعریف کرتے ہوئے کہا کہ انہوں نے اچھی طرح معاملے کو سنبھالا اور اگلی بار وہ شوہر کو ساتھ لے کر آئیں گی، میزبان یہ سوال ان سے ہی کریں۔
تابش ہاشمی کی جانب سے اداکارہ سے شو کے دوران ذو معنی سوال کرنے پر انہیں تنقید کا نشانہ بنایا گیا اور بعض صارفین نے ان کے سوال کو بیہودہ قرار دیتے ہوئے میزبان کو بے شرم بھی لکھا۔
