شوبز کی چکاچوند کے پیچھے چھپی محرومیوں سے متعلق انڈسٹری کے معروف اداکار فیضان خواجہ کی کھری باتیں منظرعام پر آگئی ہیں۔
معروف اداکار فیضان خواجہ نے شوبز انڈسٹری میں فنکاروں کو معاوضے کی عدم ادائیگی اور غیر پیشہ ورانہ رویوں پر کھل کر آواز بلند کر دی۔
انہوں نے اپنے آفیشل انسٹاگرام اکاؤنٹ پر ویڈیوز شیئر کیں جن میں انہوں نے انڈسٹری کے اندر موجود سنجیدہ مسائل کی نشاندہی کی۔
View this post on Instagram
اپنے ویڈیو پیغام میں فیضان خواجہ نے کہا کہ ان کا مقصد کسی کو بدنام کرنا نہیں بلکہ انڈسٹری کا وہ سچ سامنے لانا ہے جس پر اکثر خاموشی اختیار کی جاتی ہے۔
انہوں نے انکشاف کیا کہ سینئر فنکار اور ہدایت کار جیسے محمد احمد اور مہرین جبار جیسے نامور افراد بھی اپنی محنت کا معاوضہ لینے کے لیے پروڈکشن ہاؤسز کے چکر کاٹنے پر مجبور ہیں۔
View this post on Instagram
فیضان خواجہ نے مزید بتایا کہ انہیں خود بھی ایک اشتہار کے واجبات کے لیے کئی بار یاد دہانیاں کروانی پڑیں اور یہ مسئلہ صرف ان کا نہیں بلکہ کئی دوسرے محنتی فنکاروں کا بھی ہے جنہیں وقت پر معاوضہ نہیں دیا جاتا۔
اداکار نے واضح کیا کہ انہوں نے اداکاری کو خیرباد نہیں کہا البتہ ایسے پروڈیوسرز کے ساتھ کام کرنے سے انکار کر دیا ہے جو وعدے کے مطابق ادائیگی نہیں کرتے۔
View this post on Instagram
تاہم فیضان خواجہ کی ویڈیوز دیکھتے ہی دیکھتے سوشل میڈیا پر وائرل ہوگئیں اور مداحوں نے ان کے اس جرات مندانہ قدم کو خوب سراہا۔
مداحوں کی بڑی تعداد نے فیضان خواجہ کی اس کھری بات پر حمایت کا اظہار کیا اور ان سے دوبارہ ٹی وی اسکرین پر واپسی کی خواہش ظاہر کی۔
واضح رہے کہ فیضان خواجہ ماضی میں کئی مقبول ڈراموں میں اپنی اداکاری کے جوہر دکھا چکے ہیں لیکن حالیہ عرصے سے وہ ٹی وی اسکرین سے غیر حاضر ہیں۔
