وزیر اطلاعات مریم اورنگزیب نے کہا ہے کہ ریڈیو پاکستان ملک کا قیمتی اثاثہ ہے۔
تفصیلات کے مطابق ریڈیو پاکستان کے دورے کے موقع پر میڈیا سے گفتگو میں وزیر اطلاعات مریم اورنگزیب کا کہنا تھا کہ ریڈیو پاکستان ملک کا قیمتی اثاثہ ہے، 14 اگست 1947ءکو پاکستان کے اعلان کیلئے اسی ریڈیو کا ٹرانسمیٹر استعمال ہوا تھا۔
مریم اورنگزیب نے کہا کہ ہم نے 14 ماہ کی مختصر مدت میں ریڈیو پاکستان میں ہنگامی بنیادوں پر بحالی کا پروگرام شروع کیا، آج ریڈیو پاکستان میں 12 اسٹوڈیوز کا آغاز کیا جا رہا ہے۔
انہوں نے یہ بھی کہا کہ پی ٹی آئی کی طرف سے روز کہا جاتا تھا کہ ملک سری لنکا بنے گا لیکن ہم نے ملک کو ڈیفالٹ سے نکال کر معیشت مستحکم کی، ہمارے دور میں فچ کی ریٹنگ بہتر ہوئی، پاکستان گرے لسٹ سے نکلا، اظہار رائے کی آزادی میں پاکستان کی درجہ بندی میں سات درجے بہتری آئی۔
مریم اورنگزیب کا کہنا تھا کہ 9 مئی کو ریڈیو پاکستان، حساس عمارتوں پر حملے اور شہداء کی یادگاروں کی بے حرمتی کی گئی، آج ہم نے الحمد اللہ ریڈیو پاکستان کے لئے ایک بزنس پلان تیار کیا ہے۔
ان کا یہ بھی کہنا تھا کہ ریڈیو پاکستان سے 94 ایف ایم فریکوئنسی سے 24 گھنٹے سپورٹس کی ٹرانسمیشن شروع کی گئی ہے، اسی طرح 11 علاقائی زبانوں میں نشریات کا بھی آغاز کیا جا چکا ہے۔
وزیر اطلاعات مریم اورنگزیب کا مزید کہنا تھا کہ قومی نشریاتی اداروں کی نیلامی کا نعرہ لگانے والوں نے 2014ءمیں پی ٹی وی اور 9 مئی 2023ءکو ریڈیو پاکستان پر حملہ کیا، ہم نے اقتدار میں آ کر ان اداروں کو نیلام کرنے کے نعرے نہیں لگائے بلکہ انہیں بحال کیا۔
