ایم کیو ایم کی مرکزی کمیٹی نے سندھ حکومت کی جانب سے یونیورسٹیز انسٹیٹیوٹس ایکٹ اینڈ لاءز 2018ء میں ترمیم کی کوشش کو سختی سے مسترد کر دیا ہے۔

کمیٹی نے کہا ہے کہ اس ترمیم کا مقصد اہم ترین تعلیمی منصب کو غیر علمی و ادبی شخصیت کے سپرد کرنا ہے، جو کہ تعلیمی نظام کی پستی کا سبب بنے گا۔

کمیٹی نے اس بات کا عندیہ بھی دیا ہے کہ اگر سندھ حکومت نے اپنے مذموم عزائم کو جاری رکھا تو ایم کیو ایم اس کے خلاف مناسب پلیٹ فارمز پر احتجاج کرے گی۔

ایم کیو ایم نے اس ترمیم کو من پسند قانون سازی اور تعلیمی اداروں کو غیر علمی قوتوں کے حوالے کرنے کی سازش قرار دیتے ہوئے کہا کہ وہ کسی بھی قیمت پر اس کو کامیاب نہیں ہونے دیں گے۔

کمیٹی کا کہنا تھا کہ سندھ حکومت کی جانب سے تعصب اور تعلیم دشمنی پر مبنی قانون سازیوں کا مقابلہ کرنے کے لیے ایم کیو ایم مضبوط ترین دیوار ثابت ہوگی۔