گورنر سندھ کامران ٹیسوری نے انسداد بدعنوانی کے عالمی دن کے موقع پر آرٹس کونسل آف پاکستان کراچی میں منعقدہ سیمینار میں شرکت کی۔
اس سیمینار میں قومی احتساب بیورو (نیب) سندھ کے ڈائریکٹر جنرل جاوید اکبر ریاض، سابق گورنر اسٹیٹ بینک عشرت حسین اور آرٹس کونسل کے صدر احمد شاہ سمیت دیگر اہم شخصیات بھی موجود تھیں۔
گورنر سندھ کامران ٹیسوری نے سیمینار سے خطاب کرتے ہوئے کہا کہ انسداد بدعنوانی کا عالمی دن ہمیں اس بات کی یاد دہانی کراتا ہے کہ بدعنوانی کے خاتمے کی ذمہ داری ہم سب پر عائد ہوتی ہے۔
انہوں نے نیب کراچی کی کوششوں کو سراہا اور کہا کہ نیب نے بدعنوانی کے خاتمے کے لیے قابل تحسین اقدامات اٹھائے ہیں، اور 2024 کے دوران نیب کراچی کی کامیابیاں مثالی رہی ہیں۔
گورنر سندھ نے مزید کہا کہ نیب کراچی نے مختلف اسٹیک ہولڈرز کے ساتھ مؤثر رابطہ قائم کیا ہے، جو کہ ادارے کی کامیابیوں کا اہم حصہ ہے۔
تاہم، انہوں نے اس بات پر زور دیا کہ احتساب کے عمل کو مزید مؤثر بنانے کے لیے رویوں میں بہتری کی ضرورت ہے۔ ان کا کہنا تھا کہ جب تک عوام کا اعتماد حاصل نہیں ہوگا، احتساب بے معنی رہے گا۔
انہوں نے اس بات پر بھی زور دیا کہ ملک کی ترقی کے لیے سب کو مل کر اپنا کردار ادا کرنا ہوگا تاکہ ایک بہتر اور شفاف معاشرہ تشکیل دیا جا سکے۔
گورنر سندھ کامران ٹیسوری نے انسداد بدعنوانی کے عالمی دن کے موقع پر اس عزم کا اعادہ کیا کہ اس کے خاتمے کے لیے ہر ممکن کوشش کی جائے گی اور پاکستان میں ایک صاف ستھرا نظام قائم کرنے کے لیے ہم سب کو مل کر کام کرنا ہوگا۔
