اسپیشل انویسٹمنٹ فسیلیٹیشن کونسل (ایس آئی ایف سی) کی ایگزیکٹو کمیٹی کا 12واں اجلاس اسلام آباد میں منعقد ہوا، جس میں مختلف شعبوں میں جاری منصوبوں اور پالیسی اقدامات کی پیش رفت کا جائزہ لیا گیا۔
اجلاس کی صدارت وزیر برائے منصوبہ بندی، ترقی، اور خصوصی اقدامات احسن اقبال نے کی، جبکہ وفاقی وزراء، نیشنل کوآرڈینیٹر ایس آئی ایف سی، وفاقی سیکرٹریز، صوبائی چیف سیکرٹریز، اور دیگر اعلیٰ حکام نے شرکت کی۔
مختلف وزارتوں نے ایس آئی ایف سی کے تحت چلنے والے منصوبوں اور پالیسی اقدامات پر اب تک کی پیش رفت پیش کی۔ ان منصوبوں میں صنعت، زراعت، لائیوسٹاک، کان کنی، تیل و گیس، اور بندرگاہوں سے متعلق اہم پہلو شامل تھے۔
کمیٹی نے ان شعبوں میں پالیسی پہلوؤں پر تفصیلی تبادلہ خیال کیا اور اتفاق رائے پیدا کیا تاکہ عمل درآمد میں تیزی لائی جا سکے۔
وزیراعظم کی زیر صدارت 11ویں ایپکس کمیٹی اجلاس کے فیصلوں کے مطابق، خصوصی اقتصادی زونز کے فریم ورک میں تیز عمل درآمد کی ہدایات جاری کی گئیں۔
کمیٹی نے زور دیا کہ ملک میں صنعت کاری کے فروغ کے لیے متعلقہ اسٹیک ہولڈرز کے درمیان قریبی ہم آہنگی ضروری ہے۔
گودام اور لاجسٹکس کے شعبے کو صنعت کا درجہ دینے کی جاری کوششوں کو سراہا گیا، اور منظوری کے عمل کو تیز کرنے کی ہدایات دی گئیں۔
اس اقدام کا مقصد برآمدات، زراعت، اور مینوفیکچرنگ کے شعبوں میں جدید سپلائی چین کے بنیادی ڈھانچے کی ترقی کو یقینی بنانا ہے۔
کمیٹی نے بندرگاہوں اور جہاز رانی کے بنیادی ڈھانچے کی ترقی اور ٹرمینل ہینڈلنگ کو بہتر بنانے کے لیے فوری اقدامات کی ہدایات دیں، تاکہ برآمدات اور درآمدات کے عمل کو آسان بنایا جا سکے۔
پالیسی سطح پر زیر التواء کراس سیکٹرل معاملات کو تیز کرنے اور اسٹیک ہولڈرز کی مشاورت کے ذریعے حل نکالنے کے لیے ایس آئی ایف سی کے فورم کو مزید فعال کرنے پر زور دیا گیا۔
اجلاس کا مقصد سرمایہ کاری کے ماحول کو بہتر بنانا، جدید انفراسٹرکچر کی ترقی کے ذریعے مختلف شعبوں میں ترقی کی راہ ہموار کرنا، اور پاکستان کو عالمی اور علاقائی سپلائی چین میں ایک ترجیحی ملک کے طور پر متعارف کروانا تھا۔
