آرمی چیف جنرل عاصم منیر نے سعودی عرب کے ولی عہد اور وزیراعظم محمد بن سلمان سے ملاقات کی ہے۔
سعودی خبر رساں ادارے کے مطابق سعودی ولی عہد شہزادہ محمد بن سلمان نے العلا کے سرمائی کیمپ میں آرمی چیف جنرل عاصم منیر کا خیر مقدم کیا۔
سمو #ولي_العهد وقائد الجيش الباكستاني يستعرضان العلاقات الثنائية وفرص تطويرها.https://t.co/ZG0rWCkOwU#واس pic.twitter.com/3PhYTaPcc0
— واس الأخبار الملكية (@spagov) January 9, 2023
سعودی ولی عہد اور پاکستانی آرمی چیف کے درمیان دو طرفہ تعلقات مستحکم بنانے پر اتفاق کیا گیا اور فوجی اور دفاعی تعاون کو بھی فروغ دینے پر تبادلہ خیال کیا گیا۔
علاوہ ازں ملاقات میں دو طرفہ تعلقات اور انہیں فروغ دینے کے مواقع کا بھی جائزہ لیا گیا اور مشترکہ تشویش کے امور پر بھی تبادلہ خیال کیا گیا۔
اس سے قبل دورہ سعودی عرب کے دوران آرمی چیف جنرل عاصم منیر نے سعودی وزیر دفاع شہزادہ خالد بن سلمان سے بھی ملاقات کی تھی۔
سعودی وزیر دفاع نے سید عاصم منیر کو آرمی چیف بننے پر مبارکباد بھی پیش کی تھی اور پاک سعودی دو طرفہ تعلقات کو مضبوط بنانے پر زور دیا تھا۔
ملاقات کے دوران دونوں کے درمیان علاقائی اور بین الاقوامی امور پر بھی تبادلہ خیال کیا گیا جبکہ آرمی چیف جنرل عاصم منیر کی جانب سے پاک سعودی تعلقات کو فروغ دینے کے حوالے سے اظہار خیال بھی کیا گیا۔
واضح رہے کہ آرمی چیف جنرل عاصم منیر نے فیملی کے ہمراہ عمرہ ادا کیا، ان کی آمد پر بیت اللّٰہ کا دروازہ بھی کھولا گیا اور انہوں نے بیت اللّٰہ کے اندر نوافل ادا کیے۔
