پاکستان تحریک انصاف (پی ٹی آئی) کے چیئرمین عمران خان کی جانب سے سویڈن میں قرآن پاک کی بےحرمتی کے گھناونے فعل کی پرزور مذمت کی گئی ہے۔
سماجی رابطے کی ویب سائٹ ٹوئٹر پر جاری پیغام میں سابق وزیراعظم عمران خان نے کہا ہے کہ سویڈن میں احتجاج کے دوران قرآنِ کریم نذرِ آتش کیے جانے کی شدید ترین الفاظ میں مذمت کرتا ہوں۔
Strongly condemn burning of Holy Quran yesterday at a protest in Sweden. Last March on our govt's initiative the UNGA passed OIC sponsored landmark Res on International Day to Combat Islamophobia. It recognised that Islamophobic acts were not an expression of freedom of speech.
— Imran Khan (@ImranKhanPTI) January 22, 2023
چیئرمین پی ٹی آئی نے کہا کہ گزشتہ برس مارچ میں ہماری حکومت کی کاوش کے نتیجے میں اقوامِ متحدہ کی جنرل اسمبلی نے اسلاموفوبیا کے انسداد کے عالمی دن کے حوالے سے او آئی سی کی تائید سے تاریخی قرارداد منظور کی۔
عمران خان نے مزید کہا کہ اس قرارداد کے ذریعے اقرار کیا گیا کہ اسلام اورشعائرِ اسلام کیخلاف نفرت انگیز اقدامات کو آزادی اظہار کا تحفظ حاصل نہیں۔
چوہدری پرویز الہیٰ کی مذمت
دوسری جانب وزیراعلیٰ پنجاب چوہدری پرویز الہیٰ نے بھی سویڈن میں قرآن پاک کی بے حرمتی کے گستاخانہ واقعے کی شدید مذمت کرتے ہوئے کہا کہ قرآن کریم کی بے حرمتی کا واقعہ بدترین اورانتہائی دل آزاری والا فعل ہے۔
انہوں نے کہا کہ مہذب معاشرے میں ایسے افسوسناک واقعے کی رتی بھر بھی گنجائش نہیں۔ کسی بھی مہذب معاشرے میں الہامی کتاب کی بے حرمتی کے واقعے کا تصور بھی نہیں کیا جاسکتا۔
انکا کہنا ہے کہ قرآن کریم کا احترام ہر مسلمان کے ایمان کا حصہ ہے، آزادی اظہار کی آڑ میں ایسا واقعہ ہرگز برداشت نہیں۔
پرویز الہیٰ نے کہا کہ کیا اربوں مسلمانوں کی دل آزاری کر کے ہی آزادی اظہار کے تقاضے پورے ہوتے ہیں، سویڈن کے اس اقدام سے دنیا بھر کے اربوں مسلمانوں کی دل آزاری ہوئی ہے۔
انہوں نے مزید کہا کہ آزادی اظہار کی آڑ میں کسی کو مذہبی جذبات مجروح کرنے کی اجاز ت نہیں ہونی چاہیے، کوئی بھی مسلمان قرآن کریم کی بے حرمتی کے واقعے کسی صورت برداشت نہیں کرسکتا۔
