ملک بھر میں کل صبح ساڑھے 7 بجے پاور بریک ڈاؤن ہوا تھا اور ابھی تک لوگ بجلی سے محروم ہیں، مجموعی طور پر ملک بھر میں بجلی کی بندش کو 26 گھنٹے گزر گئے جبکہ بیشتر علاقوں میں بجلی کا تاحال کچھ اتا پتا نہیں ہے۔
تفصیلات کے مطابق بجلی کی طویل بندش پر پاکستان تحریک انصاف (پی ٹی آئی) رہنماؤں نے شہباز حکومت کو آڑے ہاتھوں لے لیا ہے۔
سماجی رابطے کی ویب سائٹ ٹوئٹر پر اپنے جاری کردہ بیان میں فواد چوہدری نے کہا کہ چوبیس گھنٹے گزرنے کے بعد بھی ملک کے مختلف علاقوں میں بجلی بدستور معطل ہے۔
چوبیس گھنٹے گزرنے کے بعد بھی ملک کے مختلف علاقوں میں بجلی بدستور معطل ہے، اس نااھل اور نکمی امپورٹڈ سرکار کی مہربانیاں زندگی کے ہر شعبے میں نظر آرہی ہیں، آٹا نہیں، بجلی نہیں قرض واپس کرنے کے پیسے نہیں مایوسی اور گھٹن پاکستان میں رقص کر رہی ہے اور نیرو بانسری بجا رہے ہیں
— Ch Fawad Hussain (@fawadchaudhry) January 24, 2023
سابق وفاقی وزیر نے کہا کہ اس نااہل اور نکمی امپورٹڈ سرکار کی مہربانیاں زندگی کے ہر شعبے میں نظر آرہی ہیں۔
فواد چوہدری نے مزید کہا کہ آٹا نہیں، بجلی نہیں قرض واپس کرنے کے پیسے نہیں، مایوسی اور گھٹن پاکستان میں رقص کر رہی ہے اور نیرو بانسری بجا رہے ہیں۔
دوسری جانب پی ٹی آئی رہنما عمران اسماعیل نے کہا کہ ملک میں پاور بریک ڈاؤن ایک سنگین صورتحال اختیار کر گیا ہے، نا اہلوں نے اپنے پاور کے لیے تباہی مچا دی۔
ملک میں پاور پیک ڈاؤن ایک سنگین صورتحال اختیار کر گیا ہے- نا اہلوں نے اپنے پاور کے لیے تباہی مچا دی- ملک میں تیل نہیں ہے، منگانے کے لیے ڈالر نہیں ہے- مگر ہٹ دھرمی جاری ہے-
— Imran Ismail (@ImranIsmailPTI) January 24, 2023
انہوں نے مزید کہا کہ ملک میں تیل نہیں ہے، منگانے کے لیے ڈالر نہیں ہے، مگر ہٹ دھرمی جاری ہے۔
پی ٹی آئی رہنما شہباز گل نے بھی اپنے ٹوئٹر پر کہا کہ 2021 میں اسی طرح سے بجلی کا پورے ملک میں بریک ڈاؤن ہوا تو عمرا یوب خان پوری رات کنٹرول روم میں رہے، 4 گھنٹے میں تمام بڑے شہروں میں بجلی بحال ہوئی اور 7 گھنٹوں میں پورے ملک کی۔
2021میں اسی طرح سے بجلی کا پورے ملک میں بریک ڈاؤن ہوا تو @OmarAyubKhan پوری رات کنٹرول روم میں رہے۔4 گھنٹے میں تمام بڑے شہروں میں بجلی بحال ہوئی اور 7 گھنٹوں میں پورے ملک کی
عمر ایوب اور میں صبح کام ختم کرنے کے بعد گھر گئے۔ اس کے باوجود خان صاحب نے بازپرس کی کہ اتنی دیر کیوں لگی
— Dr. Shahbaz GiLL (@SHABAZGIL) January 23, 2023
انہوں نے مزید کہا کہ عمر ایوب اور میں صبح کام ختم کرنے کے بعد گھر گئے، اس کے باوجود خان صاحب نے بازپرس کی کہ اتنی دیر کیوں لگی۔
علاوہ ازیں حماد اظہر نے بھی اپنے ٹوئٹر پر کہا تھا کہ الیکشن کمیشن، اسپیکر، نگراں وزیراعلیٰ کے بعد اب توانائی کا شعبہ بھی ایک مذاق بنتا جا رہا ہے۔
الیکشن کمیشن، سپیکر، نگراں وزیراعلی کے بعد اب توانائی کا شعبہ بھی ایک مزاق بنتا جا رہا ہے۔
ان نالائقوں سے کوئی پوچھے کہ بجلی احتیاط سے کیسے استعمال ہوتی ہے؟ دستانے پہن کر لائٹ کا سویچ چالو کرییں؟ https://t.co/u721SHaN73— Hammad Azhar (@Hammad_Azhar) January 23, 2023
سابق وفاقی وزیر نے مزید کہا کہ ان نالائقوں سے کوئی پوچھے کہ بجلی احتیاط سے کیسے استعمال ہوتی ہے؟ دستانے پہن کر لائٹ کا سویچ چالو کریں؟
26 گھنٹے بعد بھی تقریباً نصف کراچی بجلی سے محروم
خیال رہے کہ 26 گھنٹے گرنے کے بعد بھی کراچی کا 35 فیصد سے زائد حصہ بجلی سے محروم ہے۔
ذرائع کا کہنا تھا کہ کراچی کو بجلی فراہم کرنے والے 2 ہزار میں سے 1300 فیڈرز پر ہی بجلی بحال ہوسکی ہے۔ بحال فیڈرز پر لوڈ بیلنس کرنے کے لیے لوڈ مینجمنٹ کے نام پر ڈیڑھ سے 2گھنٹے کی لوڈشیڈنگ کی جارہی ہے۔
مزید پڑھیں: بجلی کا بڑا بریک ڈاؤن، ملک بھر میں بجلی غائب
مختلف علاقوں میں بجلی بحالی کے کچھ دیر بعد ہی پھر چلی گئی۔ بہادر آباد، دھورا جی، عسکری فور، گلستان جوہر، اورنگی ٹاؤن، لالو کھیت میں بیس گھنٹے بعد بجلی بحال ہوئی تھی اور صبح پھر چلی گئی۔
مزید پڑھیں: آئندہ 3 سے 4 گھنٹوں میں کراچی کے بیشتر حصوں میں بجلی کی بحالی کا امکان ہے، کے الیکٹرک
اس کے علاوہ ایف بی ایریا، نارتھ ناظم آباد، محمود آباد ، منظور کالونی ، ڈیفنس ویو ، قیوم آباد ، کورنگی ، لانڈھی اور اسکیم 33 کے مختلف سیکٹرز 26 گھنٹے گزرجانے کے باوجود تاحال بجلی سے محروم ہیں۔
واضح رہے کہ بجلی کی بندش کے باعث شہریوں اور اسکول جانے والے بچوں کو مشکلات کا سامنا ہے۔ بجلی کی بندش کے باعث کئی علاقوں میں گیس اور پانی کا بھی بحران ہوگیا ہے۔
