اسلام آباد: پاکستان مسلم لیگ (ن) کے سینیئر رہنما طارق فضل چوہدری کا جوان بیٹا ٹریفک حادثے میں جاں بحق ہوگیا ہے۔
تفصیلات کے مطابق اسلام آباد کے علاقے سیونتھ ایونیو پر ن لیگ کے رہنما طاری فضل چوہدری کے بیٹے کی گاڑی کو حادثہ پیش آیا جس کے نتیجے میں وہ موقع پر ہی جاں بحق ہوگیا۔
اسلام آباد میں ٹریفک حادثہ پیش آیا ہے جس میں ن لیگ کے رہنما طارق فضل چوہدری کا بیٹا جاں بحق ہوگیا ہے، جاں بحق ہونے والے شخص کا نام انزا طارق ہے۔#BOLNews #PMLN pic.twitter.com/lXvVwt9enC
— BOL Network (@BOLNETWORK) July 17, 2023
اسلام آباد پولیس نے بتایا کہ لیگی رہنما طارق فضل چوہدری کے بیٹے کی گاڑی موٹر سائیکل سوار کو بچاتے ہوئے الٹ گئی تھی جبکہ گاڑی میں طارق فضل چوہدری کے بیٹے کا دوست بھی موجود تھا۔
پولیس کا کہنا تھا کہ ٹریفک حادثے میں ایک شخص جاں بحق جبکہ دوسرے شدید زخمی کو پولی کلینک اسپتال منتقل کر دیا گیا ہے۔
خیال رہے کہ طارق فضل چوہدری کے بیٹے کی میت ان کی رہائش گاہ چک شہزاد پہنچا دی گئی ہے تاہم انکی نماز جنازہ آج شام 4 بجے ن لیگ سیکریڑیٹ پارک روڈ چھٹہ بختاور میں ادا کی جائے گی۔
دوسری جانب قومی اسمبلی کے اسپیکر راجہ پرویز اشرف نے طارق فضل چوہدری کے بیٹے کی وفات پر افسوس کا اظہار کرتے ہوئے کہا کہ مشکل کی گھڑی میں طارق فضل چوہدری اور اہلخانہ کے غم میں برابر کے شریک ہیں۔
راجہ پرویز اشرف نے مزید کہا کہ اللہ طارق فضل چوہدری اوران کے اہلخانہ کو جوان بیٹے کی وفات پر صبر و جمیل عطا فرمائے۔
