اسلام آباد: وزیراعظم محمد شہباز شریف نے کہا ہے کہ پاکستان اور سعودی عرب ہر محاذ پر ایک دوسرے کے شانہ بشانہ کھڑے رہیں گے۔
سماجی رابطے کی ویب سائٹ ایکس (ٹوئٹر) پر وزیراعظم نے کہا کہ سعودی عرب کے وزیر دفاع شہزادہ خالد بن سلمان بن عبدالعزیز السعود سے ملاقات میں انتہائی خوشی ہوئی۔
Delighted to meet and exchange views with my dear brother HRH Prince Khalid bin Salman bin Abdul Aziz Al Saud @kbsalsaud , Defence Minister of Saudi Arabia who was Guest of Honour at Pakistan Day Parade. Congratulated him on receiving the country’s highest civil award…
— Shehbaz Sharif (@CMShehbaz) March 24, 2024
انہوں نے کہا کہ اپنے عزیز بھائی سعودی عرب کے وزیر دفاع شہزادہ خالد بن سلمان بن عبدالعزیز السعود یوم پاکستان پریڈ کے مہمان خصوصی بھی تھے۔
شہباز شریف نے کہا کہ میں نے انہیں پاکستان اور سعودی عرب کے برادرانہ تعلقات کو مزید مضبوط بنانے میں ان کی گراں قدر خدمات پر ملک کا سب سے بڑا سول ایوارڈ “نشانِ پاکستان” حاصل کرنے پر مبارکباد پیش کی۔
مزید پڑھیں: وزیراعظم شہبازشریف سے سعودی وزیر دفاع کی ملاقات
وزیراعظم نے اپنے ٹوئٹر پر بتایا کہ میں نے ان کے ذریعے خادم حرمین شریفین شاہ سلمان اور ولی عہد شہزادہ محمد بن سلمان کے لیے اپنی نیک خواہشات پہنچائیں۔
انہوں نے مزید کہا کہ پاکستان اور سعودی عرب ہر محاذ پر ایک دوسرے کے شانہ بشانہ کھڑے رہیں گے۔
واضح رہے کہ گزشتہ روز یوم پاکستان کے موقع پر منعقدہ پریڈ میں وزیر اعظم شہباز شریف بھی شریک ہوئے تھے جبکہ اس پریڈ کے مہمانِ خصوصی سعودی وزیر دفاع شہزادہ خالد بن سلمان تھے۔
