لاہور بورڈ نے امتحانی عملے کی ڈیوٹی کے تعین میں شفافیت اور نظم و ضبط کو بہتر بنانے کے لیے جدید آٹومیٹڈ سسٹم کا آغاز کیا ہے۔

اس سسٹم کا مقصد امتحانی عملے کی تعیناتی میں ماضی میں پائے جانے والے بے ضابطگیوں اور مافیا کے اثرات کو ختم کرنا ہے۔

سیکریٹری لاہور بورڈ، رضوان نذیر نے اس جدید سسٹم کا افتتاح کرتے ہوئے کہا کہ اب امتحانی عملے کی تعیناتی اے آئی سسٹم کے ذریعے کی جائے گی، جو امتحانی عملے سے متعلق 15 سے 18 اہم عوامل کو چیک کرے گا۔

ان عوامل میں عملے کی تعیناتی کے دوران ان کی قابلیت، مقام اور دیگر ضروری شرائط شامل ہوں گی۔

سیکریٹری لاہور بورڈ نے اس سسٹم کے فوائد پر روشنی ڈالتے ہوئے کہا کہ ماضی میں امتحانی عملہ اپنی مرضی کے سنٹر میں ڈیوٹی لگواتا تھا اور وہاں بوٹی مافیا کے ساتھ پیسہ بناتا تھا۔

تاہم نئے آٹومیٹڈ سسٹم کی مدد سے امتحانی عملہ متعلقہ سنٹر میں تعینات ہوگا، جس سے طلباء اور عملے کے درمیان رابطہ ختم ہو جائے گا۔

سیکریٹری لاہور بورڈ نے مزید کہا کہ یہ جدید سسٹم امتحانی عمل میں شفافیت لائے گا اور مافیا کے اثرات کو ختم کرے گا، جس سے پورے امتحانی نظام میں مزید بہتری آئے گی۔