انٹرنیشنل کرکٹ کونسل (آئی سی سی) نے 2035 تک بڑے عالمی کرکٹ ایونٹس کے شیڈول اور کوالیفکیشن نظام کی منظوری دے دی، جس کے تحت ٹی ٹوئنٹی ورلڈ کپ، ون ڈے ورلڈ کپ، چیمپئنز ٹرافی اور ورلڈ ٹیسٹ چیمپئن شپ کے فائنلز کی تاریخوں اور میزبان ممالک کا اعلان کردیا گیا ہے۔

آئی سی سی بورڈ کے اجلاس میں یہ فیصلے انڈونیشیا کے شہر بالی میں کیے گئے، جن میں مردوں اور خواتین کے عالمی مقابلوں کے ساتھ لاس اینجلس اولمپکس 2028 کے کرکٹ کوالیفائرز کا شیڈول بھی شامل ہے۔

منظور شدہ کیلنڈر کے مطابق مینز ٹی ٹوئنٹی ورلڈ کپ 2028 کی میزبانی آسٹریلیا اور نیوزی لینڈ کریں گے۔ یہ ایونٹ 12 اکتوبر سے 12 نومبر تک جاری رہے گا، جبکہ 2029 کی چیمپئنز ٹرافی بھارت میں 9 سے 28 اکتوبر تک کھیلی جائے گی۔

ورلڈ ٹیسٹ چیمپئن شپ 2029 کا فائنل انگلینڈ میں 8 سے 12 جون تک ہوگا۔ اس کے بعد 2030 کا مینز ٹی ٹوئنٹی ورلڈ کپ انگلینڈ، آئرلینڈ اور اسکاٹ لینڈ میں 4 جولائی سے 4 اگست تک منعقد ہوگا۔

2031 کے ورلڈ ٹیسٹ چیمپئن شپ فائنل کی میزبانی بھی انگلینڈ کرے گا، جبکہ اسی سال مینز ون ڈے ورلڈ کپ بھارت اور بنگلہ دیش میں کھیلا جائے گا۔ عالمی کپ کا آغاز 9 اکتوبر کو ہوگا اور فائنل 23 نومبر کو شیڈول ہے۔

آئی سی سی کے مطابق 2032 کے مینز ٹی ٹوئنٹی ورلڈ کپ کے میزبان کا فیصلہ ابھی نہیں کیا گیا، جبکہ 2033 کی چیمپئنز ٹرافی اور 2034 کے ٹی ٹوئنٹی ورلڈ کپ کی میزبانی بھی بعد میں طے ہوگی۔ 2035 کے ون ڈے ورلڈ کپ اور ورلڈ ٹیسٹ چیمپئن شپ فائنل کے میزبان ممالک کا اعلان بھی تاحال باقی ہے۔

ورلڈ کپ 2027 کے لیے کوالیفکیشن کا طریقہ کار

آئی سی سی نے 2027 کے مینز ون ڈے ورلڈ کپ کے کوالیفائر کا فارمیٹ بھی منظور کرلیا ہے، جس میں 10 ٹیمیں فروری اور مارچ میں حصہ لیں گی۔ ٹیموں کو پانچ، پانچ کے دو گروپس میں تقسیم کیا جائے گا اور ایونٹ میں مجموعی طور پر 23 میچز کھیلے جائیں گے۔

دونوں گروپس کی ٹاپ ٹیمیں سیمی فائنل میں پہنچیں گی، جہاں سے فائنل کھیلنے والی ٹیمیں سامنے آئیں گی۔ کوالیفائر کی چار بہترین ٹیمیں ورلڈ کپ میں جگہ بنائیں گی۔ فاتح ٹیم براہ راست عالمی کپ کے گروپ مرحلے میں پہنچے گی، جبکہ باقی تین ٹیمیں آخری دستیاب نشست کے لیے سپر سیریز میں حصہ لیں گی۔

ٹی ٹوئنٹی ورلڈ کپ 2028 کا عالمی کوالیفائر

مینز ٹی ٹوئنٹی ورلڈ کپ 2028 کے لیے 16 ٹیموں پر مشتمل عالمی کوالیفائر 2028 کی پہلی سہ ماہی میں ہوگا، جس میں 31 میچز کھیلے جائیں گے۔ ٹیموں کو چار گروپس میں تقسیم کیا جائے گا اور ناک آؤٹ مرحلے میں کوارٹر فائنلز، سیمی فائنلز اور فائنل کے ذریعے آٹھ ٹیمیں ورلڈ کپ کے لیے کوالیفائی کریں گی۔

ہر خطے کی بہترین ٹیم کو عالمی کوالیفائر کے ذریعے براہ راست ورلڈ کپ میں جگہ ملے گی، جبکہ باقی نشستیں مجموعی درجہ بندی میں اگلی بہترین ٹیموں کو دی جائیں گی۔

ویمنز ٹی ٹوئنٹی ورلڈ کپ 2028 کا کوالیفکیشن نظام

آئی سی سی نے ویمنز ٹی ٹوئنٹی ورلڈ کپ 2028 کے عالمی کوالیفائر کے لیے بھی علاقائی نشستوں کی تقسیم منظور کرلی ہے۔ نیدرلینڈز اور اسکاٹ لینڈ کو براہ راست عالمی کوالیفائر میں شامل کیا گیا ہے، جبکہ علاقائی مقابلوں سے مزید آٹھ ٹیمیں اس مرحلے تک پہنچیں گی۔

افریقہ، ایشیا اور ایسٹ ایشیا پیسیفک سے دو، دو ٹیمیں جبکہ امریکا اور یورپ سے ایک، ایک ٹیم عالمی کوالیفائر میں جگہ بنائے گی۔ یہ علاقائی مقابلے 2027 میں ہوں گے اور عالمی کوالیفائر کی ٹاپ دو ٹیمیں ویمنز ٹی ٹوئنٹی ورلڈ کپ 2028 کے لیے کوالیفائی کریں گی۔

لاس اینجلس اولمپکس 2028 کے کرکٹ کوالیفائرز

آئی سی سی نے لاس اینجلس اولمپکس 2028 میں کرکٹ کی شمولیت کے لیے مردوں اور خواتین کے کوالیفائرز کے شیڈول اور میزبان ممالک کا بھی اعلان کردیا ہے۔

مینز کرکٹ اولمپک کوالیفائر 5 سے 13 فروری 2028 تک بنگلہ دیش میں کھیلا جائے گا، جبکہ ویمنز کوالیفائر 26 فروری سے 5 مارچ 2028 تک امریکا میں منعقد ہوگا۔

دونوں مقابلوں میں آٹھ، آٹھ ٹیمیں حصہ لیں گی، جنہیں چار، چار ٹیموں کے دو گروپس میں تقسیم کیا جائے گا۔ ہر کوالیفائر میں مجموعی طور پر 13 میچز کھیلے جائیں گے۔ گروپس کی فاتح ٹیمیں فائنل میں مدمقابل ہوں گی اور فائنل جیتنے والی ٹیم لاس اینجلس اولمپکس 2028 میں جگہ حاصل کرے گی۔

آئی سی سی کے ان فیصلوں سے آئندہ تقریباً ایک دہائی کے عالمی کرکٹ مقابلوں کا خاکہ واضح ہوگیا ہے، جبکہ مختلف عالمی ایونٹس میں شرکت کے لیے ٹیموں کو کوالیفائی کرنے کے مواقع اور طریقہ کار بھی متعین کردیا گیا ہے۔