امریکا کی ریاست کنیکٹیکٹ سے تعلق رکھنے والی گریٹ ڈین نسل کی مادہ کتیا مِنی نے دنیا کے سب سے قد آور مادہ کتے کا اعزاز حاصل کرتے ہوئے گینیز ورلڈ ریکارڈ اپنے نام کر لیا ہے۔
گینیز ورلڈ ریکارڈ کے مطابق مِنی کا قد 3 فٹ 2 انچ ناپا گیا، جو مادہ کتوں کی کیٹیگری میں اب تک کا سب سے زیادہ قد ہے۔
مِنی کے مالکان کین اور لیزا نے بتایا کہ انہوں نے اسے محض 2 ماہ کی عمر میں گود لیا تھا، جس کے بعد اس کی جسامت غیر معمولی رفتار سے بڑھنے لگی، پہلی سالگرہ تک اس کا وزن تقریباً 16 کلوگرام تک پہنچ چکا تھا۔
View this post on Instagram
جب مِنی کی عمر تقریباً ڈھائی برس ہوئی تو مالکان کی بیٹی نے خیال ظاہر کیا کہ یہ کتیا گینیز ورلڈ ریکارڈ بنانے کی صلاحیت رکھتی ہے، اس کے بعد اہلِ خانہ نے مکمل نشوونما کا انتظار کیا اور ساڑھے تین برس کی عمر میں اس کے قد کی باضابطہ پیمائش کروائی گئی۔
پیمائش کے نتائج میں مِنی کا قد 3 فٹ 2 انچ سامنے آیا، جس کے بعد اسے دنیا کی سب سے قد آور مادہ کتیا قرار دے دیا گیا۔
