سعودی عرب کا فٹ بال کلب النصر کرسٹیانو رونالڈ کی میزبانی کے لیے ماہانہ 7 کروڑ روپے ادا کرے گا۔
تفصیلات کے مطابق پرتگیزی فارورڈ کرسٹیانو رونالڈو اس وقت سعودی عرب کے دارالحکومت ریاض میں مقیم ہیں، جہاں وہ اپنے سعودی فٹ بال کلب کے ساتھ پریکٹس سیشن میں حصہ لے رہے ہیں۔
کرسٹیانو رونالڈو النصر فٹ بال کلب کے ساتھ تاریخی معاہدہ کرنے کے بعد سعودی عرب پہنچے تھے، رونالڈو ریاض کی ایک پُرتعیش ہوٹل میں مقیم ہیں، جس کا کرایہ النصر فٹ بال کلب ادا کرے گا۔
اسٹار فٹ بالر کی میزبانی کے لیے النصر فٹ بال کلب نے ریاض کے مہنگے ترین ہوٹل کے 17 کمروں پر مشتمل سوئٹ کا انتظام کیا ہے، جہاں رونالڈو اپنے اہل خانہ کے ساتھ مقیم ہیں۔
غیر ملکی میڈیا کی خبروں کے مطابق کرسٹیانو رونالڈو ریاض کے ہوٹل کنگڈم ٹاور میں اپنی گرل فرینڈ جارجینا روڈریگز اور بچوں کے ہمراہ رہائش پذیر ہیں۔
یہ بھی پڑھیں : کرسٹیانو رونالڈو کا سعودی فٹ بال کلب سے تاریخی معاہدہ
غیر ملکی میڈیا کا کہنا ہے کہ ہوٹل کنگڈم ٹاور ریاض کے مہنگے ترین ہوٹلز میں سے ایک ہے اور جس سوئٹ میں کرسٹیانو رونالڈو رہائش پذیر ہیں اس کا ماہانہ کرایہ 3 لاکھ ڈالرز جو پاکستانی روپوں میں 7 کروڑ کے قریب بنتے ہیں۔
النصر فٹ بال کلب نے کرسٹیانو رونالڈو کی میزبانی کے لیے ہوٹل کے شیف کو خصوصی ہدایات جاری کی ہیں جو پرتگالی اسٹار کو ایشیا اور مشرق وسطیٰ کے بہترین اور لذیذ کھانے فراہم کریں گے۔
کنگڈم اسٹار ہوٹل کے جس سوئٹ میں کرسٹیانو رونالڈو اپنی گرل فرینڈ اور بچوں کے ہمراہ رہائش پذیر ہیں وہ 48 سے 50 ویں فلور تک پھیلا ہوا ہے، اس سوئٹ میں ایک نجی دفتر اور میڈیا روم کی بھی سہولت میسر ہے۔
یہ بھی پڑھیں : فٹ بال کے دو عظیم کھلاڑی رونالڈو اور میسی آمنے سامنے
غیر ملکی میڈیا نے اپنی رپورٹ میں کہا ہے کہ ریاض کے اس عالیشان ہوٹل کے سوئٹ کے چارجز کی تفصیلات ہوٹل کی ویب سائٹ پر دستیاب نہیں ہیں۔
غیر ملکی میڈیا کے مطابق کرسٹیانو رونالڈو کو مداحوں سے بچانے کے لیے ہوٹل میں خصوصی انتظامات کیے گئے ہیں اور ہوٹل کے عملے کو بھی رونالڈو کے ساتھ سیلفی لینے سے منع کر دیا گیا ہے۔
واضح رہے کہ پرتگال کے فارورڈ کرسٹیانو رونالڈو نے سعودی عرب کے النصر فٹ بال کلب کے ساتھ تاریخی معاہدہ کیا تھا جس کے تحت کرسٹیانو رونالڈو 30 ماہ تک النصر کے لیے کھیلیں گے۔
کرسٹیانو رونالڈو اور النصر کے درمیان ہونے والے اس معاہدے کے تحت کرسٹیانو رونالڈو کو النصر فٹ بال 21 کروڑ 30 لاکھ ڈالرز معاوضہ ادا کرے گا۔
