پاکستان کرکٹ ٹیم کے سابق ٹیسٹ کپتان اور وکٹ کیپر محمد رضوان 19 اکتوبر سے پریذیڈنٹ ٹرافی میں سوئی ناردرن گیس کی قیادت کریں گے۔
ذرائع کے مطابق محمد رضوان کو ڈومیسٹک کرکٹ کھیلنے کی اجازت مل گئی ہے اور وہ 19 اکتوبر کو کے آر ایل کے خلاف میدان میں اتریں گے۔
نجی خبر رساں ادارے کے مطابق سوئی ناردرن گیس کے ڈائریکٹر کرکٹ اور سابق ڈائریکٹر پی سی بی محمد حفیظ نے بھی اس پیش رفت کی تصدیق کی ہے۔
محمد حفیظ کے مطابق پی سی بی کے ڈائریکٹر ڈومیسٹک، اسامہ شیرون نیازی کی جانب سے انہیں اس حوالے سے باضابطہ ای میل موصول ہوچکی ہے۔
یاد رہے کہ 34 سالہ محمد رضوان ان سات کھلاڑیوں میں شامل تھے جنہیں اگست 2026 میں لارڈز کرکٹ گراؤنڈ پر انگلینڈ کے خلاف دوسرے ٹیسٹ میں پاکستان کی 194 رنز سے شکست کے بعد پی سی بی نے ہنگامی بنیادوں پر وطن واپس بلا لیا تھا۔
بعد ازاں وکٹ کیپر بیٹر کو این سی سی آئی اے میں طلب کیا گیا، جہاں ان کے معاملے کی انکوائری جاری ہے۔
اطلاعات کے مطابق محمد رضوان اور پاکستان کرکٹ بورڈ کے درمیان معاملات بہتر بنانے کے لیے کوششیں کی جارہی ہیں۔ رضوان بھی کسی مزید محاذ آرائی کے بجائے اپنی کرکٹ پر توجہ مرکوز رکھنا چاہتے ہیں۔
اسی سلسلے میں انہوں نے پی سی بی سے ڈومیسٹک کرکٹ کھیلنے کی اجازت طلب کی تھی جس کے بعد اب وہ پریذیڈنٹ ٹرافی میں سوئی ناردرن گیس کی نمائندگی کرتے ہوئے ٹیم کی قیادت کریں گے۔
