ایپل نے اپنی متعدد مصنوعات کی قیمتوں میں نمایاں اضافہ کردیا ہے جس کے بعد ماہرین نے آئندہ آنے والے آئی فون 18 پرو اور آئی فون 18 پرو میکس کی قیمتوں میں بھی بڑے اضافے کی پیش گوئی کردی ہے۔

ایپل نے حال ہی میں اپنی کئی مصنوعات کی قیمتوں میں اضافہ کیا ہے جس کے بعد صارفین میں یہ خدشہ بڑھ گیا ہے کہ نئی آئی فون 18 پرو سیریز بھی پہلے کے مقابلے میں زیادہ مہنگی ہوسکتی ہے۔

متحدہ عرب امارات میں نئی قیمتوں کے تحت 13 انچ میک بک ایئر کی ابتدائی قیمت 4 ہزار 599 درہم سے بڑھ کر 5 ہزار 499 درہم جب کہ 15 انچ ماڈل کی قیمت 5 ہزار 499 سے بڑھ کر 6 ہزار 299 درہم ہوگئی ہے۔

اسی طرح 14 انچ میک بک پرو کی ابتدائی قیمت بھی تقریباً 7 ہزار 199 درہم سے بڑھ کر 8 ہزار 499 درہم کردی گئی ہے جو حالیہ اضافے میں سب سے نمایاں تبدیلی قرار دی جارہی ہے۔

رپورٹ کے مطابق ایپل کی جانب سے قیمتوں میں اضافے کی بڑی وجہ میموری اور محفوظ رکھنے والے پرزوں کی بڑھتی ہوئی لاگت ہے۔ کمپنی کے مطابق ان پرزوں کی فراہمی محدود جب کہ طلب میں مسلسل اضافہ ہورہا ہے جس کے باعث قیمتیں بڑھانا ناگزیر ہوگیا۔

ماہرین کا کہنا ہے کہ حالیہ اضافہ اس بات کا اشارہ ہے کہ ستمبر میں متوقع آئی فون 18 پرو سیریز بھی پہلے کے مقابلے میں زیادہ مہنگی ہوسکتی ہے۔

اندازوں کے مطابق آئی فون 18 پرو کی قیمت میں تقریباً 200 امریکی ڈالر تک اضافہ کیا جاسکتا ہے جو ماضی کے مقابلے میں دوگنا اضافہ ہوگا۔

اگر یہ پیش گوئیاں درست ثابت ہوئیں تو آئی فون 18 پرو کی ابتدائی عالمی قیمت تقریباً 1,249 سے 1,299 امریکی ڈالر جب کہ آئی فون 18 پرو میکس کی قیمت 1,349 سے 1,399 امریکی ڈالر تک ہوسکتی ہے جس سے یہ ایپل کے اب تک کے مہنگے ترین عام فروخت ہونے والے آئی فونز بن جائیں گے۔

رپورٹس میں بتایا گیا ہے کہ نئی سیریز میں زیادہ طاقتور پراسیسر، بڑی بیٹری، بہتر روشن پردہ، جدید کیمرا نظام اور مصنوعی ذہانت پر مبنی مزید خصوصیات متعارف کرائے جانے کا امکان ہے۔

واضح رہے کہ ایپل نے تاحال آئی فون 18 سیریز کی قیمت یا خصوصیات کی باضابطہ تصدیق نہیں کی جب کہ اس کی رونمائی ستمبر میں متوقع ہے۔