یوکرینی فوج نے روس کے ساتھ جنگ کے محاذ پر 491 دن گزارنے والے اپنے ایک شدید زخمی فوجی کو بڑے ڈرون کی مدد سے بحفاظت نکالنے کا دعویٰ کیا ہے۔ اس آپریشن کو اپنی نوعیت کا ایک غیر معمولی ریسکیو قرار دیا جا رہا ہے۔
غیر ملکی خبر رساں ادارے کے مطابق یوکرینی فوج کی جانب سے جاری کردہ ایک ویڈیو میں دیکھا جا سکتا ہے کہ ایک بڑا ڈرون زخمی فوجی کو ہوا میں اٹھا کر لے جا رہا ہے جبکہ فوجی اہلکار مانیٹرنگ روم سے پورے آپریشن کی نگرانی کر رہے ہیں۔ ریسکیو مشن مکمل ہونے پر اہلکار ایک دوسرے کو مبارک باد دیتے بھی دکھائی دیتے ہیں۔
رپورٹس کے مطابق متاثرہ فوجی ولاسینکو نے محاذِ جنگ پر 491 دن انتہائی مشکل حالات میں گزارے اور اس دوران زیادہ تر وقت تنہا رہا۔ اس نے بتایا کہ روسی فورسز کو یقین تھا کہ وہ ہلاک ہو چکا ہے تاہم وہ اکتوبر میں ریسکیو کیے جانے تک ایک چھوٹے سے بوائلر روم میں چھپ کر زندہ رہا۔
BREAKING:
Ukraine has carried out the first evacuation in history of a wounded soldier from the frontlines by an aerial drone https://t.co/6vnOve3BKH
— Visegrád 24 (@visegrad24) October 19, 2026
ولاسینکو کے مطابق اسے بچانے کی کوششوں کے دوران اس کے دو ساتھی فوجی بھی جان سے ہاتھ دھو بیٹھے تاہم ٹانگوں پر شدید زخموں کے باوجود وہ اپنی پوزیشن پر موجود رہا اور بالآخر اسے بحفاظت نکال لیا گیا۔
دوسری جانب خبر رساں ادارے رائٹرز نے واضح کیا ہے کہ وہ ویڈیو میں دکھائے گئے مقام اور اس کی تاریخ کی آزادانہ طور پر تصدیق نہیں کر سکا۔ ادارے کے مطابق، 19 اکتوبر 2026 سے قبل انٹرنیٹ پر اس ویڈیو کا کوئی ریکارڈ نہیں ملا۔
یہ واقعہ جنگ میں ڈرون ٹیکنالوجی کے بڑھتے ہوئے استعمال کی ایک غیر معمولی مثال ہے، جہاں ان آلات کو نگرانی اور حملوں کے علاوہ خطرناک علاقوں سے زخمی اہلکاروں کو نکالنے کے لیے بھی استعمال کیا جا رہا ہے۔
تاہم اس ریسکیو کو جنگی تاریخ میں اپنی نوعیت کا پہلا آپریشن قرار دینے کے دعوے کی آزادانہ تصدیق تاحال سامنے نہیں آئی۔
