انڈونیشیا کا آتش فشاں ’ماؤنٹ میراپی‘ نے لاوا اگلنا شروع کر دیا ہے، دھویں اور راکھ کے گہرے بادلوں نے متعدد دیہات کو متاثر کیا ہے۔
غیر ملکی میڈیا کی خبروں کے مطابق ماؤنٹ میراپی سے لاوا اگلنے سے ملحقہ آبادیوں کو خالی کرا لیا گیا ہے، جبکہ حکام نے علاقے میں سیاحت اور کان کنی کی سرگرمیاں روکنے کا حکم دیا ہے۔
یہ بھی پڑھیں : انڈونیشیا میں زلزلہ، کیفے منہدم ہونے سے 4 افراد ہلاک
انڈونیشیا کے یوگیاکارتا کے خصوصی علاقے میں واقع آتش فشاں گزشتہ رات 12 بجے کے قریب پھٹا، آتش فشاں کی گرم راکھ اور گیسز نے سات کلو میٹر تک کی فضا پر سیاہ چادر بچھا دی ہے۔
انڈونیشیا کے نیشنل ڈیزاسٹر مینجمنٹ ایجنسی کے ترجمان عبدالمہری نے کہا کہ آتش فشاں ماؤنٹ میراپی سے گرم بادلوں کا ایک کالم ہوا میں 100 میٹر بلند ہوا اور فوری طور پر جانی نقصان کی کوئی اطلاع نہیں ہے۔
آتش فشاں دن بھر پھٹتا رہا اور اس نے علاقے میں سورج کی کرنوں کو روک دیا، میراپی کی ایک مشاہداتی پوسٹ کے ایک افسر نے بتایا کہ آتش فشاں کے قریب کم از کم 8 گاؤں آتش فشاں کی راکھ سے متاثر ہوئے ہیں۔
مقامی آؤٹ لیٹ مقامی ٹی وی چینل پر نشر ہونے والی تصاویر میں جاوا جزیرے پر واقع آتش فشاں کے قریب ایک گاؤں میں راکھ سے ڈھکے مکانات اور سڑکیں دکھائی دے رہی ہیں۔
واضح رہے کہ ماؤنٹ میراپی انڈونیشیا میں سب سے فعال آتش فشاں ہے جو 2963 میٹر بلند ہے، اس آتش فشاں نے 2010 میں آخری بار لاوا اگلا تھا، جس کے نتیجے میں 300 افراد ہلاک ہوئے تھے اور تقریباً 2 لاکھ 80 ہزار علاقہ مکینوں کو نقل مکانی پر مجبور کر دیا تھا۔
گزشتہ راب ماؤنٹ میراپی میں ہونے والا دھماکہ 1930 کے دھماکے بعد سے سب سے زیادہ طاقتور دھماکہ تھا۔
آتش فشاں ماؤنٹ میراپی کے پھٹنے سے 1930 میں 1300 کے قریب لوگ لقمہ اجل بن گئے تھے جبکہ 1994 میں اس کے لاوے نے 60 افراد کی جان لے لی تھی۔
