چین نے پنشن بجٹ میں کمی کے بعد ملازمت کی ریٹائرمنٹ کی حد میں اضافہ کرنے کا فیصلہ کر لیا ہے۔

چین اپنی عمر رسیدہ آبادی اور پنشن کے نظام سے نمٹنے کی کوشش کے لیے اگلے پانچ سالوں میں اپنی قانونی ریٹائرمنٹ کی عمر میں بتدریج اضافہ کرے گا۔

ملک میں متوقع اوسط عمر اب امریکہ سے بڑھ کر 78 سال ہو گئی ہے، جو 1949 میں کمیونسٹ انقلاب کے وقت صرف 36 سال تھی۔

لیکن چین میں ریٹائرمنٹ کی عمر دنیا میں سب سے کم ہے – مردوں کے لئے 60، وائٹ کالر ملازمتوں میں خواتین کے لئے 55 اور محنت کش طبقے کی خواتین کے لئے 50 سال ہے۔.

ریٹائرمنٹ کی عمر میں اضافے کا منصوبہ گزشتہ ہفتے کمیونسٹ پارٹی کے پانچ سالہ اعلیٰ سطحی اجلاس میں منظور کی جانے والی قراردادوں کے سلسلے کا حصہ ہے، جسے تھرڈ پلینیم کے نام سے جانا جاتا ہے۔

پارٹی کی مرکزی کمیٹی نے اصلاحات پر روشنی ڈالتے ہوئے ایک اہم پالیسی دستاویز میں کہا، “مناسب لچک کے ساتھ رضاکارانہ شرکت کے اصول کے مطابق، ہم آئینی ریٹائرمنٹ کی عمر کو آہستہ آہستہ دانشمندانہ اور منظم طریقے سے بڑھانے کے لئے اصلاحات کو آگے بڑھائیں گے۔

یہ واضح نہیں کیا گیا کہ ریٹائرمنٹ کی عمر میں کتنا اضافہ کیا جائے گا اور کب تک، لیکن 2023 کے آخر میں جاری ہونے والی چائنا پنشن ڈیولپمنٹ رپورٹ میں لکھا گیا ہے کہ “ایڈجسٹمنٹ کے بعد 65 سال کی عمر حتمی نتیجہ ہوسکتا ہے”۔

یہ منصوبہ چند سالوں سے چل رہا ہے، کیونکہ چین کا پنشن بجٹ کم ہو رہا ہے۔

چین کی سرکاری اکیڈمی آف سوشل سائنسز نے 2019 میں کہا تھا کہ ملک کے مرکزی سرکاری پنشن فنڈ میں 2035 تک رقم ختم ہو جائے گی اور یہ کووڈ 19 وبائی مرض سے پہلے کا ایک تخمینہ تھا، جس نے چین کی معیشت کو بری طرح متاثر کیا تھا۔