اسلام آباد: وفاقی وزیر اطلاعات مریم اورنگزیب نے کہا ہے کہ وزیراعظم شہباز شریف اور مسلم لیگ (ن) کی چیف آرگنائزر مریم نواز نے دن رات محنت کرکے معیشت کو مستحکم کیا ہے اور عوام کو ریلیف دینے کے لیے عملی اقدامات کیے ہیں۔

وفاقی وزیر اطلاعات مریم اورنگزیب کا کہنا ہے کہ ساڑھے چار سال تک ملک میں چور اور ڈاکو مسلط رہے جس کی وجہ سے مہنگائی کا طوفان آیا اور دہشت گردی میں بھی اضافہ ہوا لیکن مسلم لیگ (ن) کی حکومت نے ملک کو دوبارہ استحکام کی راہ پر گامزن کردیا ہے۔

انہوں نے کہا کہ معیشت اس وقت مستحکم ہورہی ہے اور آئی ایم ایف کے ساتھ مثبت بات چیت جاری ہے۔ حکومت نے صنعتوں کے لیے ایک سال کے بجلی ریلیف کا اعلان کیا ہے جو ملکی معیشت کے لیے ایک خوش آئند قدم ہے۔

مریم اورنگزیب کہتی ہیں کہ اللہ کا شکر ہے کہ پالیسی ریٹ میں بھی کمی ہوئی ہے جس سے صنعتی شعبے کو استحکام ملے گا اور معیشت مزید مضبوط ہوگی۔

وفاقی وزیر اطلاعات نے الزام عائد کیا کہ جب حکومت عوام کو ریلیف دینے کے لیے اقدامات کرتی ہے تو مافیا اور سیاسی دہشت گردی کرنے والے عناصر اس کے خلاف پروپیگنڈہ شروع کردیتے ہیں۔ مسلم لیگ (ن) جب بھی اقتدار میں آئی ہے تو عوام کو ہمیشہ ریلیف دیا ہے اور مہنگائی میں کمی لائی ہے۔

ان کا کہنا تھا کہ مسلم لیگ (ن) کی حکومت نے پی ڈی ایم دور میں ملک کو ڈیفالٹ سے بچایا اور اب ملکی معیشت کو 2018 کی مستحکم صورتحال پر واپس لے کر جانے کے لیے پُرعزم ہیں۔

مریم اورنگزیب نے مزید کہا کہ ن لیگ نے اپنے منشور کے مطابق بجلی کی قیمتوں میں کمی کردی ہے اور یہ عوام کے لیے ایک بڑی خوشخبری ہے۔

انہوں نے بجلی کی قیمتوں میں کمی پر پوری قوم کو مبارکباد پیش کی اور کہا کہ حکومت اسی طرح عوامی فلاح کے منصوبے جاری رکھے گی۔