ایران کے خلاف فوجی کارروائی دوبارہ شروع کرنے کے معاملے پر اسرائیل اور امریکا کے درمیان سفارتی سرگرمیاں تیز ہوگئی ہیں۔ اسرائیلی خفیہ ایجنسی موساد کے سربراہ رومن گوفمین امریکی دارالحکومت پہنچ گئے ہیں، جہاں وہ ٹرمپ انتظامیہ کے اہم عہدیداروں سے ایران کی صورتحال پر بات چیت کریں گے۔
امریکی نیوز ویب سائٹ ایگزیوس کی رپورٹ کے مطابق موساد چیف کا یہ دورہ ایسے وقت میں سامنے آیا ہے جب اسرائیلی وزیراعظم بینجمن نیتن یاہو امریکی صدر ڈونلڈ ٹرمپ کو ایران کے خلاف دوبارہ فوجی کارروائی پر آمادہ کرنے کی کوشش کر رہے ہیں۔
رپورٹ میں ذرائع کے حوالے سے بتایا گیا ہے کہ رومن گوفمین کی امریکی سی آئی اے کے ڈائریکٹر جان ریٹکلف سے ملاقات متوقع ہے، جبکہ وہ وائٹ ہاؤس کے خصوصی نمائندے اسٹیو وٹکوف سے بات چیت کے لیے میامی بھی جا سکتے ہیں۔ تاہم متعلقہ امریکی اور اسرائیلی اداروں نے اس دورے اور ملاقاتوں کی باضابطہ تصدیق نہیں کی۔
دوسری جانب ایک امریکی عہدیدار کا کہنا ہے کہ صدر ٹرمپ فی الحال ایران کے خلاف جنگ دوبارہ شروع کرنے کے حوالے سے نیتن یاہو کے مطالبات سے اتفاق نہیں کر رہے۔ دونوں رہنماؤں کے درمیان 5 نومبر کو ہونے والی ٹیلی فونک گفتگو میں بھی ایران کی صورتحال زیر بحث آئی تھی، تاہم ٹرمپ نے فوجی کارروائی کے بجائے بحری ناکہ بندی اور معاشی پابندیوں کے ذریعے دباؤ برقرار رکھنے کو ترجیح دی۔
ادھر اسرائیل کی اندرونی سیاسی صورتحال بھی اس معاملے کو مزید پیچیدہ بنا رہی ہے۔ 27 اکتوبر کے انتخابات کے بعد نیتن یاہو پارلیمانی اکثریت سے محروم ہو چکے ہیں، جبکہ ان کے سیاسی مخالف گادی آئزنکوٹ کو نئی حکومت تشکیل دینے کی ذمہ داری سونپی گئی ہے۔ تاہم نئی حکومت کے قیام کے امکانات تاحال غیر یقینی ہیں۔
اسرائیلی اپوزیشن حلقوں میں یہ خدشہ بھی ظاہر کیا جا رہا ہے کہ نیتن یاہو اپنی سیاسی مشکلات سے توجہ ہٹانے اور اقتدار برقرار رکھنے کے لیے ایران کے ساتھ کشیدگی کو بڑھا سکتے ہیں، حتیٰ کہ ایران پر حملے یا کسی ایسے اقدام کا راستہ اختیار کر سکتے ہیں جس سے دونوں ممالک کے درمیان دوبارہ جنگ چھڑنے کا خطرہ پیدا ہو۔
رپورٹ کے مطابق نیتن یاہو نے گزشتہ روز گادی آئزنکوٹ سے تقریباً دو گھنٹے طویل ملاقات کی، جس میں انہیں ایران کی موجودہ صورتحال پر بریفنگ دی گئی۔ تاہم آئزنکوٹ کے قریبی ذرائع کے مطابق ان کا مؤقف ہے کہ موجودہ حالات ایران کے خلاف فوری فوجی کارروائی کا جواز فراہم نہیں کرتے۔
یوں ایک طرف اسرائیلی قیادت ایران کے خلاف سخت مؤقف اختیار کرنے پر زور دے رہی ہے تو دوسری جانب واشنگٹن فی الحال فوجی تصادم کے بجائے معاشی اور بحری دباؤ کی حکمت عملی جاری رکھنے کا خواہاں دکھائی دیتا ہے۔
