پاکستانی شوبز انڈسٹری کی معروف اداکارہ عائشہ عمر نے جنسی تشدد کا نشانہ بننے والی خواتین اور بچوں کے حق میں آواز بلند کردی۔
عائشہ عمر نے اپنی انسٹاگرام اسٹوری پر ایک پوسٹ شیئر کی جس میں جنسی تشدد کے واقعات میں متاثرین کو ہی ذمہ دار ٹھہرانے کے رجحان پر تنقید کی گئی ہے۔
اداکارہ کی جانب سے شیئر کی گئی پوسٹ میں مؤقف اختیار کیا گیا کہ خواتین اور بچوں سمیت مختلف طبقات جنسی تشدد کا نشانہ بنتے ہیں تاہم ایسے واقعات کے بعد اکثر متاثرہ خواتین کے لباس، گھر سے باہر نکلنے کے وقت اور دیگر معاملات پر سوالات اٹھائے جاتے ہیں۔
پوسٹ میں اس رویے پر سوال اٹھاتے ہوئے کہا گیا کہ متاثرہ افراد کو موردِ الزام ٹھہرانے کے بجائے یہ جاننے کی ضرورت ہے کہ جنسی تشدد کا ارتکاب کرنے والے افراد ایسا کیوں کرتے ہیں۔
عائشہ عمر نے یہ پوسٹ ایسے وقت میں شیئر کی ہے جب ملک میں جنسی تشدد کے مختلف واقعات خبروں اور عوامی بحث کا موضوع بنے ہوئے ہیں۔
