عمر بڑھنے کے ساتھ بالوں کا سفید ہونا ایک قدرتی عمل ہے، تاہم بعض افراد کے بال کم عمری ہی میں سفید ہونا شروع ہو جاتے ہیں۔ ماہرین کے مطابق اس کی کئی وجوہات ہو سکتی ہیں، جن میں ذہنی دباؤ، بعض طبی مسائل، غذائی کمی اور طرزِ زندگی کے عوامل شامل ہیں۔
بالوں کا قدرتی رنگ میلانن (Melanin) نامی روغن کی وجہ سے ہوتا ہے۔ عمر بڑھنے کے ساتھ میلانن بنانے والے خلیات کی سرگرمی کم ہونے لگتی ہے، جس کے نتیجے میں بال سفید ہونا شروع ہوجاتے ہیں۔ تاہم بعض عوامل اس عمل کو وقت سے پہلے بھی متاثر کر سکتے ہیں۔
مسلسل ذہنی دباؤ
ماہرین کے مطابق طویل عرصے تک رہنے والا ذہنی دباؤ جسم کے مختلف حصوں کے ساتھ ساتھ بالوں کی صحت کو بھی متاثر کر سکتا ہے۔
تحقیقات سے معلوم ہوا ہے کہ شدید یا مسلسل اسٹریس میلانن بنانے والے خلیات کو متاثر کرتا ہے، جس سے بعض افراد میں بال وقت سے پہلے سفید ہونے لگتے ہیں۔
خودکار مدافعتی بیماریاں
کچھ آٹو امیون بیماریاں بھی بالوں کے قدرتی رنگ کو متاثر کر سکتی ہیں۔ ایسی بیماریوں میں جسم کا مدافعتی نظام غلطی سے اپنے ہی صحت مند خلیات پر حملہ کرنے لگتا ہے۔اگر اس عمل سے بالوں کے رنگ سے متعلق خلیات متاثر ہوں تو بالوں میں سفیدی پیدا ہوسکتی ہے۔
یہ بھی پڑھیں: کیا آپ کے بال تیزی سے جھڑ رہے ہیں؟ جوڑوں کے درد کی دوا سے حیران کن نتائج
وٹامن بی 12 کی کمی
ماہرین کے مطابق وٹامن بی 12 کی کمی بھی بعض افراد میں قبل از وقت بال سفید ہونے سے منسلک ہو سکتی ہے۔
یہ وٹامن خون کے سرخ خلیات بنانے اور اعصابی نظام کے معمول کے کام کے لیے اہم ہے۔ اس کی کمی صحت پر مختلف اثرات مرتب کر سکتی ہے اور بعض صورتوں میں بالوں کی صحت بھی متاثر ہو سکتی ہے۔
سگریٹ نوشی
تمباکو نوشی بھی قبل از وقت بال سفید ہونے کے ممکنہ عوامل میں شامل ہے۔
سگریٹ میں موجود نقصان دہ مادے خون کی شریانوں اور جسم کے خلیات پر منفی اثر ڈال سکتے ہیں۔ ماہرین کے مطابق تمباکو نوشی اور کم عمری میں بال سفید ہونے کے درمیان تعلق مختلف مطالعات میں دیکھا گیا ہے۔
بالوں کی صحت بہتر رکھنے کے لیے کیا کریں؟
ماہرین کے مطابق متوازن غذا، مناسب نیند، ذہنی دباؤ کو کم کرنے کی کوشش اور صحت مند طرزِ زندگی مجموعی صحت کے ساتھ بالوں کی صحت کے لیے بھی اہم ہیں۔
اگر کسی شخص کے بال غیر معمولی طور پر کم عمری میں یا اچانک تیزی سے سفید ہونا شروع ہوجائیں تو خود سے سپلیمنٹس یا علاج شروع کرنے کے بجائے ڈاکٹر سے مشورہ کرنا بہتر ہے تاکہ کسی ممکنہ غذائی کمی یا طبی مسئلے کی جانچ کی جاسکے۔
