کینیا میں اپنے ضمیر کا سودا کر کے ملک کی ساکھ کو خراب کرنے والے 14 فٹ بالرز اور 2 کوچز کو معطل کر دیا گیا۔
غیر ملکی خبر رساں ادارے کی خبر کے مطابق فٹ بال کینیا فیڈریشن نے نیشنل لیگ میں دھوکہ دہی اور میچ فکسنگ کے الزامات پر 14 فٹ بالرز اور 2 کوچز کو معطل کر دیا ہے۔
فٹ بال فیڈریشن کا کہنا ہے کہ کینیا کی پریمیئر شپ ٹیم ٹسکر کا ایک کھلاڑی معطل ہونے والوں میں شامل تھا۔
معطل ہونے والوں میں زو کیریچو فٹ بال کلب کے چھ کھلاڑی بھی شامل تھے، جنہیں 2021 میں فیفا کے انٹیگریٹی یونٹ کے ذریعے میچ فکسنگ کا قصوروار پایا گیا تھا اور کینیا پریمیئر لیگ سے نکال دیا گیا تھا۔
فٹ بال کینیا فیڈریشن (ایف کے ایف) نے کہا کہ اس نے ان ملزمان کو معطل کر دیا ہے، بشمول کینیا کی پریمیئر شپ سائیڈ ٹسکر کے کھلاڑی کے جس کے خلاف ابھی باضابطہ تحقیقات نہیں ہو جاتیں۔
کینیا کی فٹ بال فیڈریشن نے اپنی ویب سائٹ پر پوسٹ کیے گئے ایک بیان میں کہا کہ فٹ بال کینیا فیڈریشن کو خفیہ رپورٹس موصول ہوئی ہیں جن میں مختلف کھلاڑیوں اور آفیشلز کے میچ فکسنگ سرگرمیوں میں ملوث ہونے کا الزام لگایا گیا ہے۔
فیڈریشن کا کہنا ہے کہ لیگ کی سالمیت اور اس کی ساکھ کو بچانے کے لیے فوری طور پر یہ اقدام اٹھایا گیا ہے، اور جب تک تحقیقات مکمل نہیں ہوتی یہ کھلاڑی معطل رہیں گے۔
یہ بھی پڑھیں : کرپٹو کرنسی کے لالچ میں کینیا کے شہری 120ملین ڈالر سے محروم
کینیا فٹ بال فیڈریشن نے لیگ کی تمام ٹیموں کو متنبہ کیا ہے کہ وہ معطلی کی مدت کے دوران معطل شدہ کھلاڑیوں اور کچز کے ساتھ کھیل سے متعلق کسی بھی رابطے سے گریز کریں۔
واضح رہے کہ فروری 2020 میں، فیفا نے کینیا کے چار کھلاڑیوں پر پابندی عائد کر دی تھی، ایک کھلاڑی پر تاحیات پابندی لگائی گئی تھی، جو کہ لیگ میچز کو فکس کرنے کی بین الاقوامی سازش کا حصہ تھا۔
اسی اسکینڈل پر کینیا کے پانچ ریفریوں کو بعد میں معطل کردیا گیا تھا۔
کینیا فروری 2022 میں فنڈز کے مبینہ غلط استعمال پر فیفا کی جانب سے معطل کیے جانے کے بعد نومبر میں بین الاقوامی فٹ بال میں واپس آیا اور فٹ بال کی ایک نگراں کمیٹی مقرر کی ہے۔
یاد رہے کہ 2004 میں فیفا نے کینیا کو حکومتی مداخلت کی وجہ سے تین ماہ کے لیے معطل کر دیا تھا، لیکن ملک کی جانب سے نئے قوانین تیار کرنے کے لیے قبول کیے جانے کے بعد صورت حال تبدیل ہو گئی۔
