چین کے جنوب مشرقی حصے میں سمندری طوفان ‘تالیم’ نے تباہی مچا دی ہے اور لاکھوں افراد بے گھر ہو گئے ہیں۔
تفصیلات کے مطابق چین کے جنوب مشرقی حصے میں آنے والے طاقتور سمندری طوفان ’تالیم‘ نے تباہی مچا دی ہے، طوفان کے باعث 2 لاکھ 30 ہزار افراد بے گھر ہو گئے ہیں۔
واضح رہے کہ رواں سال مون سون کی وجہ سے ایشیا کا بڑا حصہ موسلادھار بارشوں اور شدید گرمی کی لپیٹ میں ہے۔
سمندری طوفان تالیم نے پروازوں میں خلل ڈالا اور ماہی گیری کے دیہات اور ساحلی سیاحتی مقامات کو بند کردیا، لیکن ویتنام کے راستے میں کمزور ہوگیا۔
جاپان میں ہیٹ اسٹروک سے 60 افراد بیمار پڑ گئے جبکہ چین کے کچھ حصوں میں ریکارڈ درجہ حرارت دیکھا جا رہا ہے۔
جنوبی کوریا میں کئی روز سے جاری موسلادھار بارشوں اور لینڈ سلائیڈنگ سے مرنے والوں کی تعداد 41 تک پہنچ گئی ہے۔
آج چین کے ہمسایہ صوبے گوانگسی سے ٹکرانے سے قبل سمندری طوفان تالیم کی گوانگ ڈونگ صوبے میں 140 کلومیٹر فی گھنٹے کی رفتار سے چلنے والی ہواؤں نے نظام درہم برہم کر دیا۔
گوانگ ڈونگ سے گزرنے والے طوفان کے دوران درخت چلتی گاڑیوں پر گر گئے جبکہ ایک وہیل ساحل پر آ گئی۔
سرکاری میڈیا کے مطابق فائر فائٹرز نے درختوں کی شاخوں سے گرنے والی گاڑیوں میں پھنسے مسافروں کو بچایا اور سڑکوں کو ملبے سے صاف کیا اور دیگر موٹر سائیکل سواروں کو محفوظ مقام پر پہنچانے میں مدد کی۔
مقامی حکام نے ماہی گیری کی 2700 کشتیوں کو واپس بلا لیا ہے اور 8200 سے زائد ماہی گیروں کو محفوظ مقامات پر منتقل کرنے کا حکم دیا ہے۔
چین کے شمال مغربی صوبے سنکیانگ کے ایک دور افتادہ قصبے میں چین کا سب سے زیادہ درجہ حرارت 52.2 ڈگری سینٹی گریڈ ریکارڈ کیے جانے کے دو روز بعد یہ طوفان آیا ہے۔
جاپان میں ٹوکیو ڈزنی لینڈ اور ڈزنی سی نے شدید گرمی کی وجہ سے پیر کے روز کچھ آؤٹ ڈور ایونٹس اور شوز کو عارضی طور پر روک دیا ہے۔
جاپانی حکام نے ملک کے 47 میں سے 32 ریاستوں میں ہیٹ اسٹروک کی وارننگ بھی جاری کی ہے کیونکہ کئی مقامات پر درجہ حرارت 40 ڈگری سینٹی گریڈ تک پہنچ گیا ہے۔
جنوبی کوریا میں امدادی کارکنوں نے منگل کے روز وسطی پہاڑی علاقے چیونگجو میں سیلاب زدہ سرنگ سے آخری لاش نکالی۔
جنوبی کوریا کے صدر یون سوک یول نے کہا ہے کہ وہ شدید موسم کے حوالے سے ملک کے نقطہ نظر کو مکمل طور پر تبدیل کر دیں گے کیونکہ اس طرح کے واقعات ‘زیادہ عام’ ہو جائیں گے۔
دریں اثنا ہیٹ ویو کی وجہ سے امریکہ اور یورپ میں بھی راتوں رات درجہ حرارت بڑھ گیا۔ توقع ہے کہ گرم موسم اگلے ہفتے تک جاری رہے گا۔
