آرمی چیف نے کہا ہے کہ پاکستان میں امن و استحکام کی بحالی کے لئے شہداء کی قربانیاں رائیگاں نہیں جائیں گی۔

 پاک فوج کے شعبہ تعلقات عامہ (آئی ایس پی آر) کے مطابق چیف آف آرمی سٹاف جنرل سید عاصم منیر نے جنوبی وزیرستان کا دورہ کیا ، جنوبی وزیرستان آمد پر کور کمانڈر پشاور نے چیف آف آرمی سٹاف کا استقبال کیا۔

آئی ایس پی آر کے مطابق دورے کے دوان آرمی چیف کو علاقے میں سیکورٹی صورتحال اور انٹیلیجنس اور انسداد دہشت گردی کے آپریشنز پر بریفنگ دی گئی۔

دورے کے دوران آرمی چیف نے علاقے میں متعین افسروں اور جوانوں سے بھی ملاقات کی جبکہ آرمی چیف نے دہشت گردی کے خلاف افسروں اور جوانوں کے غیر متزلزل عزم کو بھی سراہا۔

آرمی چیف جنرل سید عاصم منیر نے کہا کہ شہداء ہمارا فخر ہیں، پاکستان میں امن و استحکام کی بحالی کے لئے شہداء کی قربانیاں رائیگاں نہیں جائیں گی۔

جنرل سید عاصم منیر نے یہ بھی کہا کہ دشمن کے ایجنڈے کے تحت پاکستان کو غیرمستحکم کرنے والے دہشت گردوں اور ان کے سہولت کاروں کا پیچھا کیا جائے گا۔

آرمی چیف جنرل سید عاصم منیر نے مزید کہا کہ ریاست پاکستان کے سامنے ہتھیار ڈالنے تک دہشت گردوں کا پیچھا کیا جائے گا۔