پینٹاگان کا کہنا ہے کہ جاپان کے زیر انتظام ایک بھارتی کیمیائی ٹینکر پر ایران کی جانب سے فائر کئے گئے ڈرون سے نشانہ بنایا گیا۔

عرب میڈیا کے مطابق یہ پہلا موقع ہے جب پینٹاگون نے ایران پر عسکریت پسند گروپ حماس کے خلاف اسرائیل کی جنگ کے آغاز کے بعد سے کھلے عام بحری جہازوں کو نشانہ بنانے کا الزام عائد کیا ہے۔

پینٹاگون کے مطابق یہ حملہ ایسے وقت میں کیا گیا ہے جب 7 اکتوبر کو اسرائیل اور حماس کے درمیان جنگ شروع ہونے کے بعد سے یمن کے ایران کے حمایت یافتہ حوثی باغیوں کی جانب سے بحیرہ احمر کے اہم شپنگ لین پر نئے ڈرون اور میزائل حملوں کا سلسلہ جاری ہے۔

پینٹاگون کی جانب سے جاری بیان میں کہا گیا ہے کہ بحر ہند میں ہونے والا یہ حملہ مقامی وقت کے مطابق صبح 10 بجے ہوا جس میں جہاز پر کوئی جانی نقصان نہیں ہوا۔

بیان میں مزید کہا گیا ہے کہ امریکی فوج اس بحری جہاز کے ساتھ رابطے میں ہے کیونکہ یہ بھارت میں اپنی منزل کی طرف بڑھ رہا ہے۔

یہ ڈرون حملہ بھارت کے ساحل سے 200 ناٹیکل میل کے فاصلے پر ہوا اور اس کے آس پاس امریکی بحریہ کا کوئی جہاز موجود نہیں تھا۔

پینٹاگون کے بیان میں کہا گیا ہے کہ ایم وی کیم پلوٹو جہاز لائبیریا کے جھنڈے تلے سفر کرتا ہے اور اسے ہالینڈ کا ایک ادارہ چلاتا ہے، حالانکہ یہ جہاز ایک جاپانی کمپنی کی ملکیت ہے۔

میری ٹائم سیکیورٹی فرم امبری نے کہا کہ “کیمیائی / مصنوعات کا ٹینکر  اسرائیل سے وابستہ تھا اور سعودی عرب سے بھارت جا رہا تھا۔

وال اسٹریٹ جرنل نے رپورٹ کیا ہے کہ ایم وی کیم پلوٹو کو چلانے والی ڈچ کمپنی “اسرائیلی شپنگ ٹائیکون ایڈن اوفر سے منسلک ہے۔

بھارتی بحریہ کا کہنا ہے کہ اس نے مدد کی درخواست کا جواب دے دیا ہے۔

بحریہ کے ایک عہدیدار نے عالمی خبر رساں ادارے کو بتایا کہ ایک طیارہ روانہ کیا گیا ہے۔

بھارتی بحریہ کا ایک جنگی جہاز بھی روانہ کر دیا گیا ہے تاکہ ضرورت کے مطابق مدد فراہم کی جا سکے۔

فوری طور پر اس حملے کی ذمہ داری کسی نے قبول نہیں کی ہے۔